जळगाव मिरर | १२ मे २०२६
नशिराबाद परिसरातील एका प्रकरणाची चौकशी बंद करण्यासाठी ५० हजार रुपयांची लाच मागितल्याप्रकरणी मंडळ अधिकारी मिलींद देवरे यांच्यासह एका खासगी इसमाविरुद्ध गुन्हा दाखल करण्यात आला आहे. नाशिक लाचलुचपत प्रतिबंधक विभागाने (एसीबी) ही कारवाई करत खासगी इसम सुरेंद्र प्रल्हाद अहिरे याला लाचेची रक्कम स्वीकारताना रंगेहाथ पकडले. या कारवाईमुळे जळगाव महसूल विभागात मोठी खळबळ उडाली आहे.
या प्रकरणातील तक्रारदाराविरोधात स्थानिक रहिवाशांनी महसूल विभागासह इतर शासकीय कार्यालयांकडे तक्रारी केल्या होत्या. तक्रारदार शेतामध्ये अवैधरित्या खोदकाम करत असल्याचा आरोप करण्यात आला होता. या तक्रारींची चौकशी बंद करण्यासाठी मंडळ अधिकारी मिलींद देवरे यांनी सुरुवातीला तक्रारदाराकडे एक लाख रुपयांच्या लाचेची मागणी केल्याचे समोर आले आहे.
तडजोडीनंतर ५० हजार रुपये स्वीकारण्याचे ठरले होते. याबाबत तक्रारदाराने नाशिक एसीबीकडे तक्रार दाखल केली. त्यानंतर एसीबीने पडताळणी केली असता देवरे यांनी लाचेची रक्कम खासगी इसम सुरेंद्र अहिरे याच्याकडे देण्यास सांगितल्याचे निष्पन्न झाले.
यानंतर एसीबीच्या पथकाने पिंप्राळा तलाठी कार्यालयाबाहेर सापळा रचला. ठरल्याप्रमाणे तक्रारदाराने सुरेंद्र अहिरे याला ५० हजार रुपयांची रक्कम दिली असता, पथकाने त्याला रंगेहाथ पकडले. त्यानंतर मंडळ अधिकारी मिलींद देवरे आणि सुरेंद्र अहिरे या दोघांविरुद्ध रामानंद नगर पोलिस ठाण्यात गुन्हा दाखल करण्यात आला आहे.
ही कारवाई नाशिक एसीबीचे सापळा अधिकारी राहुलकुमार नाईक यांच्या मार्गदर्शनाखाली करण्यात आली. पथकात हवालदार प्रफुल्ल माळी, विलास निकम यांचा सहभाग होता. पुढील तपास जळगाव एसीबीचे पोलिस निरीक्षक हेमंत नागरे करत आहेत.
