जळगाव मिरर | २० मे २०२६
जळगाव जिल्ह्यातील भुसावळ शहरात बेकायदेशीररीत्या वास्तव्यास असलेल्या आणखी एका बांगलादेशी महिलेला शोधण्यात जळगाव पोलिसांना मोठे यश मिळाले आहे. भुसावळ बाजारपेठ पोलीस स्टेशनच्या हद्दीत कारवाई करत पोलिसांनी एका महिलेविरुद्ध इमिग्रेशन आणि परदेशी कायदा, २०२५ अंतर्गत गुन्हा दाखल केला आहे. या प्रकरणामुळे शहरात खळबळ उडाली असून बनावट कागदपत्रांच्या आधारे परदेशी नागरिक भारतात राहत असल्याचा गंभीर मुद्दा पुन्हा ऐरणीवर आला आहे.
पोलिसांनी दिलेल्या माहितीनुसार, आरोपी महिलेचे मूळ नाव फरीदा बेगम मोहम्मद खान (वय ४२) असून ती बांगलादेशातील भीमकाठी, उपजिल्हा नाझीरपूर, जिल्हा पीरोजपुर येथील रहिवासी आहे. भारतात आल्यानंतर तिने स्वतःची ओळख लपवत “जस्मिन बी मोहम्मद खान” या नावाने भुसावळमधील दीनदयाल नगर परिसरात वास्तव्य सुरू केले होते. प्राथमिक चौकशीदरम्यान आरोपीने धक्कादायक माहिती दिली. तिने सन २००९ मध्ये एका दलालास सुमारे ५ हजार रुपये देऊन बोटीच्या सहाय्याने नदीमार्गे बांगलादेशातून पश्चिम बंगालमध्ये बेकायदेशीर प्रवेश केल्याची कबुली दिली. त्यानंतर रेल्वेने ती भुसावळ येथे पोहोचल्याचे तपासात निष्पन्न झाले आहे.
तपासादरम्यान पोलिसांनी आरोपीकडून मोबाईल फोन जप्त केला. मोबाईलच्या तांत्रिक विश्लेषणात ॲपद्वारे +880 या बांगलादेशी कंट्री कोडवरील क्रमांकांशी सातत्याने संपर्क, चॅटिंग आणि व्हिडिओ कॉलिंग झाल्याचे पुरावे समोर आले. मोबाईलमध्ये आरोपीच्या जन्मदाखल्याची प्रतही पोलिसांना आढळून आली. यापुढील चौकशीत आणखी गंभीर बाब उघड झाली. आरोपीने तिच्या मृत बहिणीच्या नावावरील वीजबिल आणि इतर कागदपत्रांचा वापर करून स्वतःच्या नावाने रेशन कार्ड, आधार कार्ड, मतदान ओळखपत्र, पॅन कार्ड, बँक पासबुक आणि भारतीय पासपोर्ट तयार करून घेतल्याचे तपासात समोर आले आहे.
विशेष म्हणजे, या बनावट भारतीय पासपोर्टच्या आधारे आरोपी महिला मे २०२३ मध्ये बांगलादेशात जाऊन पुन्हा भारतात परतल्याचा धक्कादायक खुलासा पोलिस तपासातून झाला आहे. त्यामुळे संबंधित कागदपत्रे तयार करणाऱ्या व्यक्ती, एजंट आणि दलालांचे जाळे सक्रिय असल्याचा संशय व्यक्त केला जात आहे.
या प्रकरणी गुन्हा क्रमांक २६५/२६ अन्वये इमिग्रेशन आणि परदेशी कायदा, २०२५ मधील कलम २१, २२ व २३ अंतर्गत गुन्हा दाखल करण्यात आला असून पोलिसांकडून पुढील तपास सुरू आहे. आरोपीला बनावट कागदपत्रे तयार करून देणारे संबंधित एजंट, दलाल व इतर व्यक्तींचा शोध पोलीस घेत आहेत. दरम्यान, जळगाव पोलिसांनी नागरिकांना आवाहन केले असून परिसरात संशयास्पद हालचाली करणाऱ्या अथवा बनावट कागदपत्रांच्या आधारे वास्तव्यास असलेल्या व्यक्तींबाबत तातडीने पोलिसांना माहिती देण्याचे आवाहन करण्यात आले आहे.
