जळगाव मिरर | ३१ मार्च २०२४
यावल चितोडा रस्त्यावर चितोडा गावाकडे जाणारे अवैध वाळू वाहतूकीचे सुसाट वेगात धावणारे डंपर पलटी झाल्याची घटना घडली जीवित हानी झाली नसली तरी घटनास्थळी डंपरचे दोन तुकडे झाले अवैध वाळू वाहतुकीचे डंपर पलटी झाल्याचे वृत्त यावल तहसीलदार सौ.मोहन माला नाझीरकर यांना कळताच त्यांनी घटनास्थळी धाव घेऊन पुढील कारवाई करण्याचे आदेश यावल पोलीस व आपल्या महसूल विभागाला दिले. हि घटना रविवार दि.३१ मार्च २०२४ रोजी सकाळी ९ वाजेच्या सुमारास घडली आहे.
मिळालेल्या माहितीनुसार, यावल ते चितोडा रस्त्यावर सकाळी ९ वाजेच्या सुमारास सुसाट वेगाने धावणारे अवैध वाळूचे डंपर पलटी झाल्याने तसेच घटनास्थळी डंपरचे २ तुकडे पडले,अवैध वाळू डंपरची घटना घडता बरोबर यावल तहसीलदार सौ.मोहनमाला नाझीरकर यांनी तातडीने घटनास्थळी भेट देवून पुढील कारवाई केल्यामुळे यावल महसूलच्या तिजोरीत मोठी आर्थिक भर आर्थिक वर्ष अखेर पडल्याची घटना घडली. जिवीत हानी झाली नसली तरी डंपर मालकाचे मोठे आर्थिक नुकसान झाल्याचे बोलले जात आहे.
अवैध वाळूचे डंपर पलटी होऊन डंपरचे दोन तुकडे झाले असले तरी याबाबत यावल तहसीलदार यांच्या आदेशान्वये यावल पोलीस स्टेशनला डंपर चालक, मालका विरुद्ध गुन्हा दाखल करण्याची प्रक्रिया सुरू असून या प्रकरणात महसूल विभागामार्फत अवैध वाळू वाहतूक उघड झाल्याने वाहन मालका विरुद्ध दंडात्मक कारवाई केली जाणार असल्याचे सुद्धा यावल तहसीलदार सौ.मोहनमाला नाझीरकर यांनी सांगितले.
संपूर्ण जळगाव जिल्ह्यात गौण खनिज वाहतूक करणारे अवैध व रीतसर परवाना काढून गौण खनिजाची वाहतूक करणारे डंपर हे रस्त्याच्या परिस्थितीकडे व सार्वजनिक वाहतुकीकडे आणि रस्त्याने वाहतूक करणाऱ्या इतर वाहनांकडे मोटर सायकल चालकांकडे नागरिकांकडे दुर्लक्ष करीत सुसाट वेगाने आपली वाहने चालवीत असल्याने ठिकठिकाणी अपघात होऊन जीवित हानी होत आहे व काही मोठ्या प्रमाणात अपघात होत आहेत त्यामुळे पोलीस आणि महसूल विभागाने आपापल्या कार्यक्षेत्रात गौण खनिज वाहतूक करणाऱ्या ट्रॅक्टर,डंपर मालकांची वाहन चालकांची बैठक घेऊन वाहने मर्यादित वेगात चालविण्याबाबत तसेच माती, गाळ, इत्यादी गौण खनिजाची वाहतूक करताना त्यावर ताडपत्री,फट बांधण्याची अट कंपल्सरी करावी अशी सर्व स्तरातून मागणी होत आहे.