जळगाव मिरर । ५ मे २०२३
शहरातील एका फार्मास्यूटीकल ॲण्ड डिस्टीब्युटर्सच्या गोडावूनला दि.5 रोजी शुक्रवारी दुपारी बारा वाजेच्या सुमारास अचानक आग लागल्याने परिसरात एकच धावपळ उडाली होती. या आगीत लाखो रुपयांचा औषध जळून खाक झाल्याची माहिती समोर आली आहे. याठिकाणी लागलीच अग्निशमन दलाच्या चार बंबांच्या मदतीने आगीवर नियंत्रण मिळविण्यात यश आले.
मिळालेल्या माहिती नुसार शहरातील जयकिसन वाडी परिसरात असलेल्या सुरज एजन्सी दुकानाच्या तळमजल्यावरील औषधांचा साठा असलेले गोडावून आणि कार्यालय असून शुक्रवारी दुपारी हे गोडावून बंद असताना अचानक आग लागली. गोडावूनमधून मोठ्या प्रमाणावर धूर निघत होते. येथील बारी यांच्या लक्षात आल्यानंतर त्यांनी तत्काळ अग्निशमन विभागाच्या कार्यालयाकडे धाव घेवून अग्निशमन अधिकारी शशिकांत बारी यांना आगीची माहिती दिली. त्यानंतर अग्निशमन दलाच्या चार बंब घटनास्थळी दाखल झाले. दीड ते पाऊण दोन तासांच्या अथक प्रयत्नानंतर आग नियंत्रणात आणली. यावेळी आग विझविण्यासाठी अग्निशमन दलाचे देविदास सुरवाडे, संजय भोईटे, प्रकाश कुमावत, युसूफ पटेल, रवींद्र सपकाळे, रोहिदास चौधरी, तेजस जोशी, दिलीप पवार, गिरीष खडके, राजेंद्र रानवडे, सरदार पाटील, परमेश्वर सोनवणे आदी जवानांनी परीश्रम घेतले.
