जळगाव मिरर | २७ मार्च २०२५
भरधाव बसच्या धडकेत दुचाकीस्वार अशोक यशवंत सपकाळे (वय ६२) हे गंभीर जखमी झाले. त्यांना तात्काळ किनगाव ग्रामीण रुग्णालयात दाखल करण्यात आले. मात्र त्यांची प्रकृती चिंताजनक असल्याने त्यांन जिल्हा रुग्णालयात दाखल करण्यात आले. त्यांच्यावर उपचार सुरु असतांना बुधवारी दुपारच्या सुमारास मृत्यू झाला. याप्रकरणी यावल पोलीस ठाण्यात अपघाताचा गुन्हा दाखल करण्यात आला आहे.
सविस्तर वृत्त असे कि, यावल तालुक्यातील किनगाव गावाजवळ यावल कडून येत असलेल्या (एमएच १४ बी.टी. २१४४) क्रमांकाची बस घेवून चालक विदगाव मार्गे जळगावकडे जात होते. यावेळी कृषी विद्यालयाच्या समोर एस.टी. बसने (एमएच १९, एटी ८५८८) क्रमांकाच्या मोटारसायकलवरुन जात असलेल्या अशोक यशवंत सपकाळे यांना धडक दिली. या अपघातात सपकाळे यांच्या डोक्याला, पायाला गंभीर दुखापत होवून ते जखमी झाले. अपघाताची माहिती मिळताच बाजार समितीचे उपसभापती बबलू कोळी, सचिन तडवी, गुड्डू पिंजारी यांनी जखमी सपकाळे यांना तात्काळ किनगाव ग्रामीण रुग्णालयात दाखल केले. याठिकाणी वैद्यकीय अधिकारी डॉ. दर्शना निकम, मोहीनी धांडे, भाग्यश्री भारंबे, सरदार कनाशा यांच्या पथकाने उपचार केले.
अपघातात जखमी झालेल्या अशोक सपकाळे यांची प्रकृती चिंताजनक असल्याने त्यांना पुढील उपचारासाठी जिल्हा शासकीय वैद्यकीय महाविद्यालयाच्या रुग्णालयात दाखल केले. याठिकाणी त्यांच्यावर उपचार सुरु असतांना त्यांचा दुर्देवी मृत्यू झाला. मयत अशोक सपकाळे हे जेडीसीसी बँकचे सेवानिवृत्त कर्मचारी होते. त्यांच्या पश्चात पत्नी, एक मुलगा तीन मुली असा परिवार आहे.
अपघाताची माहिती मिळताच यावल पोलीस ठाण्याचे पोलीस निरीक्षक प्रदीप ठाकूर, पोहेकॉ सुनिल पाटील हे घटनास्थी दाखल झाले. त्यांनी अपघातग्रस्त एसटी बस आणि दुचाकी पोलीस ठाण्यात आणली. याप्रकरणी बस चालकाविरुद्ध गुन्हा दाखल करण्यात आला असून तपास उपनिरीक्षक पाराजी वाघमोडे, हवालदार संदीप सूर्यवंशी, किशोर परदेशी करीत आहे.
