जळगाव मिरर | २७ मार्च २०२६
पाचोरा बसस्थानक परिसरात नागरिकांना लक्ष्य करत धाडसी चोरी करणाऱ्या अट्टल चोरट्यांना पाचोरा पोलीस स्टेशनच्या गुन्हे शाखेने अखेर जेरबंद करत प्रभावी कामगिरी बजावली आहे. या कारवाईत जिल्ह्यात विविध ठिकाणी गुन्हे दाखल असलेल्या आरोपीसह एका विधीसंघर्ष बालकाचा समावेश असून, पोलिसांनी पुन्हा एकदा आपली सतर्कता सिद्ध केली आहे.
जळगाव जिल्ह्यातील बसस्थानक परिसरात वाढत्या चोरीच्या घटनांच्या पार्श्वभूमीवर पोलीस अधीक्षक श्री. महेश्वर रेड्डी यांनी कडक सूचना देत विशेष कारवाईचे आदेश दिले होते. त्यानुसार पोलीस निरीक्षक श्री. राहुलकुमार पवार यांच्या नेतृत्वाखाली गुन्हे शाखेने तपासाची सूत्रे हाती घेतली.
दिनांक 24 मार्च 2026 रोजी सुभाष विठ्ठल भावसार (वय 70, रा. उप्पलखेडा, ता. सोयगाव, जि. छत्रपती संभाजीनगर) हे पाचोरा कृषी उत्पन्न बाजार समितीत बाजरी विक्री करून मिळालेली सुमारे 50 हजार रुपयांची रक्कम घेऊन बसमध्ये चढत असताना अज्ञात चोरट्यांनी त्यांची रक्कम चोरून नेली. या प्रकरणी पाचोरा पोलीस स्टेशन येथे गुन्हा दाखल करण्यात आला होता. घटनेचे गांभीर्य ओळखून गुन्हे शाखेने गोपनीय माहितीच्या आधारे सापळा रचत आरोपी अंकुश सुरवाडे (वय 19) यास अटक केली. विशेष म्हणजे सदर आरोपी हा मु.पो.का.क-56 अन्वये दोन वर्षांसाठी जिल्ह्यातून हद्दपार करण्यात आलेला असूनही चोरीच्या उद्देशाने पाचोऱ्यात दाखल झाला होता. त्याच्यासोबत असलेल्या एका विधीसंघर्ष बालकालाही ताब्यात घेण्यात आले. दोन्ही आरोपींकडून कसून चौकशी केली असता त्यांनी गुन्ह्याची कबुली दिली असून, त्यांच्या विरोधात आणखी गुन्हे उघड होण्याची शक्यता पोलिसांनी व्यक्त केली आहे. या टोळीने जिल्ह्यातील विविध भागात अशाच प्रकारच्या चोरीच्या घटना केल्याचा संशय व्यक्त करण्यात येत आहे.
ही धडक कारवाई पोलीस अधीक्षक श्री. महेश्वर रेड्डी, अपर पोलीस अधीक्षक कविता नेरकर व उपविभागीय पोलीस अधिकारी श्री. बापू रोहम यांच्या मार्गदर्शनाखाली पार पडली. पोलीस निरीक्षक राहुलकुमार पवार यांच्या नेतृत्वाखाली पोलीस कर्मचारी योगेश पाटील, संदीप राजपूत, हरीश परदेशी, गणेश कुवर तसेच होमगार्ड पंकज सोनवणे व अमोल गायकवाड यांनी महत्त्वाची भूमिका बजावली. या प्रकरणाचा पुढील तपास पोलीस हेड कॉन्स्टेबल राहुल शिंपी करत असून, सार्वजनिक ठिकाणी विशेषतः बसस्थानक परिसरात सावध राहण्याचे आवाहन पोलिसांनी नागरिकांना केले आहे.
