जळगाव मिरर | संदीप महाले
देशासमोरील जागतिक आर्थिक संकट, वाढती महागाई आणि विविध आव्हानांच्या पार्श्वभूमीवर पंतप्रधान नरेंद्र मोदी यांनी गेल्या काही दिवसांपूर्वीच काटकसरीचा संदेश देत अनावश्यक खर्च टाळण्याचे आवाहन केले होते. मात्र, त्याच पार्श्वभूमीवर जळगाव भाजपातर्फे जामनेर तालुक्यातील गारखेडा येथील एका पर्यटनस्थळी आयोजित करण्यात आलेले दोन दिवसीय ‘पंडित दीनदयाल उपाध्याय प्रशिक्षण शिबिर’ आता चर्चेचा विषय ठरत आहे.
भाजपचे पदाधिकारी आणि कार्यकर्त्यांसाठी आयोजित करण्यात आलेल्या या शिबिरासाठी निवडण्यात आलेले ठिकाण, भोजन व्यवस्था, निवास तसेच इतर सोयी-सुविधांवर मोठ्या प्रमाणावर खर्च होणार असल्याची ही चर्चा सुरु झाली आहे. या शिबिरातील कार्यकर्त्यांनी परिसरातील पर्यटनस्थळांचा देखील आनंद घेत सोशल मीडियावर फोटो देखील व्हायरल होत आहे.
विशेष म्हणजे, एकीकडे भाजपाचे हे शिबिर तुलनेने भव्य स्वरूपात होत असल्याची चर्चा असताना, दुसरीकडे जळगाव शहरात राष्ट्रीय स्वयंसेवक संघाचे तीन राज्यांसाठीचे प्रशिक्षण शिबिर अत्यंत साधेपणाने सुरू आहे. एका विद्यालयाच्या साध्या पटांगणावर आयोजित या शिबिरात स्वयंसेवकांकडून शिस्त, साधेपणा आणि राष्ट्रहिताला प्राधान्य दिले जात असल्याचे चित्र पाहायला मिळत आहे.
यामुळे “मातृसंस्था म्हणून ओळखल्या जाणाऱ्या संघाकडून साधेपणाचा आदर्श ठेवला जात असताना भाजप पदाधिकाऱ्यांकडून मात्र काटकसरीच्या संदेशाला केराची टोपली दाखविली जात असल्याचा सवाल उपस्थित होत आहे. या संपूर्ण प्रकरणात अधिकृत आयोजकांची स्पष्ट भूमिका समोर आल्यानंतरच वास्तव परिस्थिती स्पष्ट होणार असली, तरी गारखेड्यातील या शिबिरामुळे जिल्ह्यात राजकीय चर्चांना मात्र उधाण आले आहे.
पदाधिकाऱ्यांचे नौकाविहार व फोटोसेशन ?
भाजपाच्या पदाधिकाऱ्यांचे पर्यटन स्थळी प्रशिक्षण सुरू असून आज पहिल्या दिवशी सायंकाळी सर्वच पदाधिकाऱ्यांनी नौकाविहार करत या ठिकाणी फोटोसेशन देखील केले. याचे व्हिडिओ सोशल मीडियावर देखील व्हायरल झाले आहे. त्यामुळे हे पदाधिकारी प्रशिक्षण घेण्यासाठी गेले की पर्यटन करण्यासाठी गेले याची देखील चर्चा सोशल मीडियावर सुरू झाली आहे.
