जळगाव मिरर | संदीप महाले
जळगाव जिल्ह्यात विधान परिषद स्थानिक स्वराज्य संस्था मतदार संघाच्या निवडणुकीतील उमेदवारांच्या नावाची घोषणा कुठल्याही क्षणी होण्याची शक्यता असताना आता भाजपचे जुने कार्यकर्ते नाराज असल्याची चर्चा सुरू झाली आहे. जळगाव येथील जागेवर भाजप एकनिष्ठ व जुन्या कार्यकर्त्याला उमेदवारी देण्यात यावी अशी मागणी कार्यकर्ते करीत असल्याची माहिती सूत्रांनी दिली आहे.
गेल्या महानगरपालिका निवडणुकीत देखील नवख्या कार्यकर्त्यांना पक्षातील नेत्यानी संधी दिली होती, त्यामुळे देखील एकनिष्ठ कार्यकर्ते नाराज झाले होते. आता या निवडणुकीत देखील तीन ते चार वर्षाआधी पक्षात येवून दोन महत्वाची पदे असताना देखील आमदारकीचे स्वप्न पाहणाऱ्याना नेत्यानी जुन्या कार्यकर्त्यांना संधी दिली पाहिजे अशी भावना पक्षातील जुन्या कार्यकर्त्यानी व्यक्त केली आहे.
मंत्री महाजन कुणाला देणार संधी ?
भाजपचे संकटमोचक मंत्री गिरीश महाजन यांचा जिल्ह्यात चांगलाच दबदबा असून जिल्ह्यातील अनेक ठिकाणी त्यांचे ‘खास’ कार्यकर्ते देखील आहे. त्यातील एक म्हणजे पाचोरा मतदार संघात शिवसेनेच्या शिंदे गटाला विधानसभेच्या निवडणुकीत चांगलेच अडचणीत आणणारे अमोल शिंदे ही संकटमोचक यांचे ‘खास’ कार्यकर्ते म्हणून ओळखले जातात. त्यांनी नेहमीच पाचोरा मतदार संघात शिंदे गटाला चांगलीच टक्कर देखील दिली आहे.
अमोल शिंदे यांना देखील यंदाच्या निवडणुकीत उमेदवारी मिळावी अशी अपेक्षा कार्यकर्त्यानी व्यक्त केली आहे तर दुसरीकडे रावेर मतदार संघात माजी मंत्री एकनाथराव खडसे यांनी पक्षाला ‘राम राम’ ठोकल्यानंतर पक्षाला बळ देण्यासाठी याठिकाणी नंदकिशोर महाजन यांनी मोठे परिश्रम घेतले आहे. त्यामुळे त्यांच्या देखील कार्यकर्त्यानी यंदा नंदकिशोर महाजन यांना उमेदवारी मिळावी यासाठी प्रयत्न सुरू केले आहे. आता संकटमोचक मंत्री गिरीश महाजन कुणाचे आमदारकीचे स्वप्न पूर्ण करतात ही पाहणे महत्वाचे ठरणार आहे.
