जळगाव मिरर | ८ मे २०२६
जळगाव शहरातील शिरसोली रस्त्यावरील हॉटेल आमंत्रण येथे जेवण करत असताना एकमेकांकडे पाहण्याच्या किरकोळ कारणावरून झालेला वाद थेट रक्तरंजित हल्ल्यापर्यंत पोहोचला. या घटनेत मध्यप्रदेशातील इंदौर येथील विशाल शरद हंसारी (वय ३६) यांच्यावर तिघांनी धारदार चाकूने वार करून गंभीर जखमी केले. ही घटना दि. ६ मे रोजी रात्री साडेसहा वाजेच्या सुमारास घडली. याप्रकरणी एमआयडीसी पोलिस ठाण्यात तिघांविरोधात गुन्हा दाखल करण्यात आला आहे.
मिळालेल्या माहितीनुसार, विशाल हंसारी हे त्यांचा शालक कुणाल राजेश बारसे आणि मित्र राहुल संजय हाडा यांच्यासह शिरसोली रोडवरील हॉटेल आमंत्रण येथे जेवणासाठी गेले होते. त्यावेळी दुसऱ्या टेबलावर बसलेले तिघे संशयित वारंवार त्यांच्या दिशेने पाहत असल्याचे हंसारी यांच्या लक्षात आले. यावरून “तुम्ही तुमचे जेवण करा, आमच्याकडे पाहू नका,” असे सांगितल्याने दोन्ही गटांमध्ये शाब्दिक वाद सुरू झाला.
वाद वाढत गेल्यानंतर संशयितांनी विशाल हंसारी व त्यांच्या सोबतच्या दोघांना शिवीगाळ करत चापटा-बुक्क्यांनी मारहाण केली. त्यानंतर संशयित तुषार सोनवणे याने कमरेला खोचलेला धारदार चाकू काढून विशाल हंसारी यांच्या पोटावर वार केला. अचानक झालेल्या या हल्ल्यामुळे हॉटेल परिसरात एकच गोंधळ उडाला.
हल्ल्यात गंभीर जखमी झालेल्या विशाल हंसारी यांना तात्काळ खासगी रुग्णालयात दाखल करण्यात आले. उपचारानंतर त्यांनी एमआयडीसी पोलिस ठाण्यात तक्रार दिली. त्यानुसार तुषार ईश्वर सोनवणे (रा. जोशीवाडा, मेहरुण), राज सोनवणे आणि विशाल नावाच्या अन्य एका संशयिताविरुद्ध गुन्हा दाखल करण्यात आला आहे. या प्रकरणाचा पुढील तपास एमआयडीसी पोलिस करीत आहेत.
