जळगाव मिरर | २२ फेब्रुवारी २०२६
चाळीसगाव शहरातील कोर्ट परिसरात एका वकिलावर सुरी व कोयत्याने प्राणघातक हल्ला केल्याची गंभीर घटना २० फेब्रुवारीला दुपारी सुमारे २.४५ वाजेच्या सुमारास घडली होती. या प्रकरणी चाळीसगाव शहर पोलीस ठाण्यात तिघा हल्लेखोरांविरुद्ध गुन्हा दाखल करण्यात आला आहे.
या संदर्भात शहरातील नारायण वाडीतील जखमी वकील समीर अफजल शेख (वय ४५) यांनी दिलेल्या जबाबानंतर गुन्हा दाखल करण्यात आला आहे. दरम्यान, अॅड. समीर शेख हे नेहमीप्रमाणे कोर्टात काम करत असताना संशयित नाज उर्फ माज आरीफ खाटीक याने फोन करून त्यांची चौकशी केली. तर आपण कोर्टात असल्याचे सांगताच काही वेळातच आरिफ रहेमतुल्ला खाटीक, दानीश आरीफ खाटीक व नाज उर्फ माज आरीफ खाटीक (सर्व रा. हिरापूर रोड, चाळीसगाव) हे लोखंडी सुरी व कोयता घेऊन कोर्ट परिसरात आले. तर, आरीफ खाटीक याने ‘आज याला संपवून टाका’ असे सांगताच दानीश खाटीकने सुरीने अॅड. शेख यांच्या पोटात वार करण्याचा प्रयत्न केला. मात्र, अॅड. शेख मागे झाल्याने ते बचावले. त्याचवेळी नाज उर्फ माज खाटीक याने कोयत्याने डोक्यावर वार करण्याचा प्रयत्न केला.
परंतु, अॅड. शेख यांनी डावा हात डोक्यावर धरल्याने कोयता हातावर लागल्याने बोटांना इजा झाली. त्यानंतर जखमी अवस्थेत अॅड. शेख यांना तत्काळ बापजी हॉस्पिटलमध्ये उपचारार्थ दाखल करण्यात आले. दरम्यान, प्लॉट खरेदी-विक्रीच्या वादातून हा हल्ला झाल्याचे प्राथमिक तपासात समोर आले आहे. या प्रकरणी या तिघांवर विविध कलमान्वये गुन्हा दाखल करण्यात आला आहे. तपास स.पो.नि. शंकर मुटेकर करत आहेत. शहरातील न्यायालय परिसरात घडलेल्या या घटनेमुळे वकील व नागरिक चांगलेच धास्तावले आहेत.
