जळगाव मिरर/ संदीप महाले
जळगाव सार्वजनिक बांधकाम विभागातील लाचखोरी नंतर पुन्हा एकदा हे विभाग चर्चेत आले आहे. एका वरिष्ठ अधिकाऱ्याने परदेशी नामक अधिकाऱ्याच्या सुनेच्या नावाने तब्बल १७ लाखांचे कामे दिल्याचा प्रकार समोर आला आहे. तर दुसरीकडे जिल्ह्यात अनेक सुशिक्षित बेरोजगार तरुणांना कामे न देता आता सार्वजनिक बांधकाम विभागात परिवाराचा वंश चालविण्याची नवीन पद्धत समोर आली आहे.
सूत्रांनी दिलेल्या माहितीनुसार, शहरातील एका वसतिगृह परिसरातील अंतर्गत रस्ता दुरुस्ती आणि कार्यालयाच्या रंगकामाची दोन कामे एकाच दिवशी मंजूर करण्यात आली. दोन्ही आदेशांतील अटी, कालावधी आणि प्रशासकीय बाबींमध्ये साम्य असल्याने निविदा प्रक्रिया स्पर्धात्मक होती की केवळ कागदोपत्री? असा प्रश्न उपस्थित केला जात आहे. संबंधित कुटुंबाचा विभागाशी जुना संबंध असल्याने काही निर्णयांमध्ये “विशेष सवलत” मिळाली का, अशीही चर्चा सुरू झाली आहे. मात्र, याबाबत प्रशासनाकडून कोणतेही अधिकृत स्पष्टीकरण समोर आलेले नाही. विशेष म्हणजे, सार्वजनिक बांधकाम विभागात हितसंबंधांचा संघर्ष टाळणे, पारदर्शकता राखणे आणि निविदा प्रक्रियेत निष्पक्षता पाळणे अपेक्षित असताना, या प्रकरणात सर्व निकषांचे काटेकोर पालन झाले का, हा प्रश्न अधिक तीव्र झाला आहे.
अधिकाऱ्याच्या सुनेवर बांधकाम विभाग मेहरबान ?
सार्वजनिक बांधकाम विभागातील परदेशी नामक सेवानिवृत्त अधिकाऱ्याची सून दर्शना हर्षल परदेशी या नावावर दोन कंत्राट एकूण १७ लाखांची कामे देण्यासाठी सार्वजनिक बांधकाम विभाग कसे काय मेहरबान झाले अशी चर्चा आता सुरु झाली आहे. अशा या अधिकाऱ्यांमुळे सुशिक्षित बेरोजगार तरुणांना कंत्राट मिळत नसल्याने जिल्ह्यातील बेरोजगारी देखील मोठ्या प्रमाणात वाढू लागली आहे.
‘त्या’ परिवाराला अधीक्षक अभियंत्यांचा आशीवार्द ?
एकाच परिवारातील मुलाला व सुनेला सार्वजनिक बांधकाम विभागातील अधिकारी दोन कंत्राट देत असतील म्हणजेच हे काही नजरचुकीने किंवा दुय्यम अधिकाऱ्याचे काम नाही यात विभागातील वरिष्ठ अधिकारी देखील सामील असतील यात तीळमात्र शंका नाही. त्यामुळे ‘परदेशी’ नामक परिवाराला नक्कीच अधीक्षक अभियंत्यांचा आशीवार्द असल्याची चर्चा जोर धरू लागली आहे.
(पुढील भागात ‘त्या’ अधिकाऱ्याचे आणखी काही कारनामे)
