जळगाव मिरर | २६ नोव्हेबर २०२४
पाचोरा शहरातील एकाने पोलीस ठाण्यात फोन करुन मारहाण व खून केल्याची खोटी माहिती दिली होती. या प्रकरणी खोटी माहिती देणाऱ्याविरुद्ध पाचोरा पोलीस ठाण्यात गुन्हा दाखल करण्यात आला आहे. पाचोरा पोलीस स्टेशनला डायल ११२ वर २४ नोव्हेंबर रोजी सकाळी ९.२५ वाजेच्या सुमारास अज्ञात व्यक्तीने मोबाईल क्रमांक ७७९८८ ४४४९८ वरुन फोन करुन, शहरातील जारगाव चौफुलीवर १५० ते २०० लोक विशिष्ट समाजाच्या लोकांना मारहाण करत आहेत. त्यापैकी २ लोकांचा खून झालेला आहे. यात चॉपर सारख्या हत्याराचा वापर केलेला आहे. तत्काळ पोलीस पाठवा याबाबत फोन आलेला होता.
मिळालेल्या माहितीनुसार, पाचोरा पोलीस ठाण्यातील कर्मचारी रात्री उशिरापर्यंत निवडणुकीचा महत्वाचा बंदोबस्त करुन सकाळी पुन्हा कर्तव्यावर हजर होताच, आलेल्या कॉलचे गांभीर्य ओळखून पाचोरा पोलीस ठाण्यातील पोलीस कर्मचारी तत्काळ घटनास्थळी गेले. तर फोनवरुन मिळालेल्या माहितीप्रमाणे सखोल चौकशी केली. परंतु, या ठिकाणी अशी कोणतीही घटना घडलेली नव्हती. तर फोन केलेल्या व्यक्तीच्या मोबाईलनंबर वरुन शोध घेतला असता तो पारोळा तालुक्यातील तामसवाडी शैलेश रवींद्र पाटील येथील रहिवासी व हल्ली पाचोऱ्यातील जारगाव चौफुली असल्याचे स्पष्ट झाले. शैलेंद्र पाटील यास या घटनेबाबत विचारपूस केली असता, मी मुद्दामहून पोलीस स्टेशनला फोन केलेला आहे, तशी काही एक घटना घडलेली नाही, असे त्याने सांगितले.
दरम्यान, शैलेश पाटील याने नागरिक व पोलीसांना त्रास व्हावा, या हेतुने मुद्दामहून पोलिसांना डायल ११२ वर कॉल करुन खोटी माहिती दिल्याने शैलेश पाटील याच्याविरुध्द २४ रोजी भारतीय न्याय संहिता २०२३ चे कलम २१२ अन्वये गुन्हा दाखल करण्यात आला आहे. या घटनेचा तपास पोलीस उप निरीक्षक सुनील पाटील करत आहेत. दरम्यान, महाराष्ट्र पोलीस दलातर्फे डायल ११२ ही सुविधा महिला, मुली व ज्येष्ठ नागरिकांकरीता गंभीर प्रसंगात तत्काळ मदत उपलब्ध होण्याकरीता सुरु केलेली आहे. तर, नागरिकांनी डायल ११२ वर गंभीर प्रसंगीच पोलीस मदतीकरीता कॉल करावा, असे आवाहन पोलिसांकडून करण्यात येत आहे.
