जळगाव मिरर | ८ सप्टेंबर २०२६
पुर्व वैमानस्यातून चिकन विक्रेते गोपाल मधुकर चौधरी यांच्यावर कोयत्याने हल्ला करीत जीवेठार मारण्याचा प्रयत्न केला. यामध्ये चौधरी यांच्या डोक्याला, चेहऱ्यावर गंभीर दुखापत झाली असून त्यांच्यावर उपचार सुरु आहे. ही घटना रविवार दि. ६ सप्टेंबर रोजी रात्री साडेनऊ वाजता बी. जे. मार्केट परिसरात घडली. याप्रकरणी हल्ला करणाऱ्या सुनिल रसाळ राठोड (रा. कांचन नगर) यांच्याविरुद्ध गुन्हा दाखल करण्यात आला आहे.
मिळालेल्या माहितीनुसार, शहरातील कासमवाडी परिसरात राहणारे गोपाल चौधरी यांची शहरातील बी. जे. मार्केट परिसरात चिकनची हातगाडी आहे. यापुर्वी गोपाल चौधरी आणि सुनिल राठोड यांच्यात भांडण झाल्यामुळे त्यांनी एमआयडीसी पोलिस ठाण्यात गुन्हा दाखल केला असून ते प्रकरण न्यायालयात न्यायप्रविष्ठ आहेत. दि. ६ सप्टेंबर रोजी नेहमीप्रमाणे गोपाल चौधरी यांनी हातगाडी लावलेली होती. रात्री साडेनऊ वाजेच्या सुमारास त्यांच्या गाडीजवळ सुनिल राठोड हा हातात कोयता आणि लाकडी दांडुका घेवून आला. गोपाल चौधरी यांनी यापुर्वी पोलिसात गुन्हा दाखल केल्याच्या रागातून गोपाल चौधरी आज तुला जीवंत सोडणार नाही, तुला आज संपवितो असे म्हणत कोयत्याने चौधरी यांच्यावर हल्ला केला.
राठोड याने गोपाल चौधरी यांच्या डोक्यावर, चेहऱ्यावर कोयत्याने वार केल्यामुळे ते रक्तबंबाळ अवस्थेत पडलेले होते. त्यांचा मुलगा आणि पुतणे हे वाचविण्यासाठी गेले असता, त्यांना देखील राठोड याने दांडक्याने मारहाण केली आणि तो दुचाकीने तेथून पसार झाला. रक्तबंबाळ अवस्थेत पडलेल्या गोपाल चौधरी यांना तात्काळ जिल्हा शासकीय वैद्यकीय महाविद्यालय व रुग्णालयात दाखल केले. याठिकाणी प्राथमिक उपचार घेतल्यानंतर त्यांना नातेवाईकांनी खासगी रुग्णालयात हलविले. येथे त्यांच्यावर उपचार सुरु असून त्यांचा पुतण्या सचिन चौधरी यांनी दिलेल्या फिर्यादीवरुन संशयित सुनिल रसाळ राठोड (रा. कांचननगर) याच्याविरुद्ध जिल्हापेठ पोलिसात गुन्हा दाखल करण्यात आला आहे. या गुन्ह्याचा तपास करीत असतांना पोलीस उपनिरीक्षक संजय भांडारकर व कैलास शिंदे यांनी सोमवारी दुपारच्या सुमारास घटनास्थळी पंचनामा केला. तसेच घटनास्थळाहून फॉरेन्सीकच्या पथकाने पुरावे देखील गोळा करण्यात आले आहे.
