जळगाव मिरर / २ मार्च २०२३ ।
तब्बल चार वर्षांनंतर मोठ्या पडद्यावर दमदार पुनरागमन करणारा अभिनेता शाहरुख खान ‘पठाण’ या चित्रपटाने बॉक्स ऑफिसवर कमाईचे नवे विक्रम रचले. प्रदर्शनाच्या बऱ्याच दिवसांनंतरही शाहरुख आणि दीपिका पदुकोणच्या ‘पठाण’ने दमदार कमाई केली. मात्र चित्रपटाच्या प्रदर्शनापूर्वी त्याला बराच विरोध झाला होता. पठाणमधील ‘बेशर्म रंग’ हे गाणं जेव्हा प्रदर्शित झालं, तेव्हा देशभरातून त्याला विरोध झाला. या गाण्यातील एका दृश्यात दीपिका भगव्या रंगाच्या बिकिनीमध्ये दिसली. त्यामुळे दीपिकाने सनातन धर्माचा अपमान केला, अशी टीका काही हिंदू संघटनांकडून झाली. इतकंच नव्हे तर या चित्रपटावर बहिष्काराचीही मागणी झाली. या सर्व वादादरम्यान शाहरुख आणि दीपिकाने मात्र मौन बाळगलं होतं. आता दीपिकाने यामागचं खरं कारण सांगितलं आहे.
दीपिकाच्या बिकिनीमधील सीनवर आक्षेप घेत चित्रपटातून तो काढण्याची मागणी करण्यात आली होती. मात्र चित्रपटातून हे दृश्य हटवलं गेलं नाही आणि निर्मात्यांनीही समोर येऊन कोणतंच स्पष्टीकरण दिलं नाही. विशेष म्हणजे पठाणच्या संपूर्ण टीमने चित्रपटाचं कोणत्याच प्रकारे प्रमोशन न करण्याचा निर्णय घेतला होता. आता नुकत्याच दिलेल्या एका मुलाखतीत दीपिकाने यामागचं कारण सांगितलं. गप्प राहून सर्वकाही सहन करण्याशिवाय दुसरा कोणता मार्ग समजत नव्हता, असं ती म्हणाली. चित्रपटासाठी केलेली इतक्या महिन्यांची मेहनत वाया घालवायची नव्हती, असंही तिने सांगितलं.
“मी आम्हा दोघांसाठी हे म्हणू शकत नाही. मात्र मला स्वत:ला दुसरा कोणता मार्ग दिसत नव्हता. मला असं वाटतं की आपल्याला ज्याप्रकारचे संस्कार मिळतात, आपण पुढे जाऊन तसंच वागतो. आम्ही मुंबईत एक स्वप्न घेऊन आलो होतो. आमच्याकडे फक्त कमिटमेंट, मेहनत आणि विनम्रताच होती आणि त्याच्याच जोरावर आम्ही इथवर पोहोचलो. अशा कठीण काळाला सामोरं जाणं हे फक्त अनुभवाने येऊ शकतं. आम्ही दोघं ॲथलीट होतो. त्याने शाळेत आणि कॉलेजमध्ये असताना विविध खेळांमध्ये भाग घेतला होता हे मला आधी माहीत नव्हतं. मात्र हे खेळच तुम्हाला संयम शिकवतात”, असं दीपिका म्हणाली. बेशर्म रंग’ या गाण्यात दीपिकाने भगव्या रंगाची बिकिनी घातली होती आणि त्यावरूनच हा वाद निर्माण झाला होता. भाजपसोबतच विश्व हिंदू परिषद आणि इतर हिंदू संघटनांनी या चित्रपटाचा विरोध केला होता. भगव्या रंगाची बिकिनी घालून बोल्ड सीन देत दीपिकाने सनातन धर्माचा अपमान केला, असा आरोप केला गेला.
