जळगाव मिरर | १० जून २०२६
अमळनेर शहरातील जिजाऊ नगर परिसरातील रहिवासी तथा वैद्यकीय शिक्षण घेत असलेले तरुण डॉक्टर डॉ. सुमित पाटील यांचा लखनऊ येथे झालेल्या भीषण अपघातानंतर उपचारादरम्यान मृत्यू झाल्याची दुर्दैवी घटना मंगळवारी (दि. ९) सकाळी घडली. त्यांच्या निधनाची बातमी समजताच अमळनेर शहरासह शैक्षणिक व सामाजिक क्षेत्रात हळहळ व्यक्त करण्यात येत असून परिसरावर शोककळा पसरली आहे.
मिळालेल्या माहितीनुसार, अमळनेर येथील ढेकू रोडवरील जिजाऊ नगर परिसरात राहणारे डॉ. सुमित पाटील हे लखनऊ येथे वैद्यकीय शिक्षण घेत होते. दि. ७ जून रोजी रात्री सुमारे ८ वाजेच्या सुमारास ते दुचाकीवरून जेवणासाठी जात असताना एका वळणावर उभ्या असलेल्या ट्रकला त्यांच्या दुचाकीची जोरदार धडक बसली. संबंधित ट्रकचा मागील टेललॅम्प बंद असल्याने अंधारात ट्रक उभा असल्याचे त्यांना दिसून आले नाही, अशी प्राथमिक माहिती समोर आली आहे.
या अपघातात डॉ. पाटील यांच्या पोटाला गंभीर दुखापत झाली होती. अपघातानंतर त्यांना तातडीने लखनऊ येथील वेदांता हॉस्पिटलमध्ये दाखल करण्यात आले. तेथे त्यांच्यावर उपचार सुरू होते. मात्र उपचारादरम्यान त्यांची प्रकृती अधिक गंभीर बनली आणि अखेर दि. ९ जून रोजी सकाळी त्यांची प्राणज्योत मालवली. डॉ. सुमित पाटील हे सारबेटेकर प्रा. आर. एस. पाटील यांचे चिरंजीव असून जळगाव जिल्हा परिषदेतील अधिकारी डी. एस. पाटील यांचे पुतणे होते. अभ्यासू, मनमिळावू आणि होतकरू विद्यार्थी म्हणून त्यांची ओळख होती. त्यांच्या अकाली निधनामुळे नातेवाईक, मित्रपरिवार तसेच शिक्षण क्षेत्रात मोठी शोकभावना व्यक्त केली जात आहे.
दरम्यान, डॉ. सुमित पाटील यांची अंत्ययात्रा बुधवार, दि. १० जून रोजी सकाळी ११ वाजता जिजाऊ नगर, ढेकू रोड, अमळनेर येथून निघणार असून त्यानंतर त्यांच्यावर अंत्यसंस्कार करण्यात येणार आहेत.
