जळगाव मिरर | १२ मे २०२६
रस्त्याच्या कामाचे बिल मंजूर करून देण्यासाठी पाच लाखांची लाच स्वीकारताना रंगेहाथ पकडण्यात आलेल्या सार्वजनिक बांधकाम विभागाच्या शाखा अभियंता योगेश अहिरे याच्याबाबत चौकशीत नवे धक्कादायक खुलासे समोर येत आहेत. लाचलुचपत प्रतिबंधक विभागाच्या (एसीबी) तपासात अहिरे याने दोन वेळा दुबईसह बँकॉक दौरे केल्याची माहिती समोर आली आहे. या दौऱ्यांमागील आर्थिक व्यवहारांचीही चौकशी सुरू करण्यात आली आहे.
मनपा प्रभाग क्रमांक १४ मधील विनोबा नगर परिसरातील सिमेंट काँक्रीट रस्त्याच्या कामाचे थकीत बिल मंजूर करण्यासाठी योगेश अहिरे याने तब्बल १५ लाख रुपयांची मागणी केल्याचा आरोप आहे. त्यातील साडेसात लाख रुपये स्वतःसाठी, तर उर्वरित रक्कम वरिष्ठ अधिकाऱ्यांसाठी असल्याचे सांगण्यात आले होते. या लाचेतील पहिला हप्ता म्हणून पाच लाख रुपये स्वीकारताना एसीबीच्या पथकाने अहिरे याला रंगेहाथ अटक केली होती.
सध्या अहिरे पोलीस कोठडीत असून त्याची कसून चौकशी सुरू आहे. सोमवारी एसीबीच्या पथकाने त्याच्या कार्यालयासह निवासस्थानी झाडाझडती घेतली. मात्र या कारवाईत कोणतीही संशयास्पद कागदपत्रे किंवा मोठी मालमत्ता आढळून आली नाही. तरीही भ्रष्टाचाराच्या माध्यमातून अपसंपदा जमविल्याचा संशय व्यक्त केला जात असून त्याच्या आर्थिक व्यवहारांचा सखोल तपास सुरू आहे.
दरम्यान, या व्यवहारात नगरसेविका पुत्र ‘पाटील’ आडनावाच्या एका व्यक्तीला सहा टक्के रक्कम देण्याचेही सांगण्यात आल्याची माहिती तपासात समोर आली आहे. संबंधित व्यक्ती अद्याप चौकशीसाठी हजर झाली नसून एसीबीने त्यालाही चौकशीच्या रडारवर ठेवले आहे.
या प्रकरणात अहिरे यांनी वरिष्ठ अधिकाऱ्यांच्या नावाने लाच मागितल्याचा मुद्दाही पुढे आला आहे. संबंधित वरिष्ठ अधिकाऱ्यांची चौकशी करण्यात आली असून त्यांनी आपला या प्रकरणाशी कोणताही संबंध नसल्याचे स्पष्ट केले आहे. तक्रारदाराच्या कामाची बिले अहिरे यांनी तयार केली होती, मात्र ती पुढील मंजुरीसाठी सादरच करण्यात आली नव्हती. त्यामुळे संबंधित फाईल वरिष्ठ अधिकाऱ्यांपर्यंत पोहोचली नसल्याचे त्यांनी जबाबात नमूद केले आहे. एसीबीकडून आता अहिरे यांच्या मालमत्ता, परदेश दौरे आणि आर्थिक व्यवहारांची सखोल चौकशी सुरू असून या प्रकरणात आणखी धक्कादायक माहिती समोर येण्याची शक्यता व्यक्त केली जात आहे.
