जळगाव मिरर | २९ जानेवारी २०२४
रविवारी सकाळी साडेसातच्या सुमारास हिंजवडीलगतच्या मारुंजी येथील हॉटेल एलिगण्ट ओयो टाऊनहाऊसमध्ये लखनौ येथून आलेल्या प्रियकराने आयटी कंपनीत काम करणाऱ्या अभियंता प्रेयसीची पाच गोळ्या घालून निघृण हत्या केल्याची धक्कादायक घटना उघडकीस आली आहे. दरम्यान, हिंजवडी पोलिसांनी आरोपी प्रियकराला अटक केली आहे. हिंजवडी येथील वंदना के. द्विवेदी (वय २६) असे खून झालेल्या तरुणीचे नाव आहे. ऋषभ रमेश निगम (३०, रा. उत्तर प्रदेश) असे ताब्यात घेतलेल्या तरुणाचे नाव आहे.
पोलिसांनी दिलेल्या माहितीनुसार, लखनौ येथील ऋषभ रमेश निगम रहिवासी असून आरोपी आणि वंदना यांची लखनौ येथे ओळख झाली होती. मागील काही वर्षांपासून त्यांच्यात प्रेमसंबंध होते. वंदना हिंजवडीत एका आयटी कंपनीत नोकरीला होती. २५ जानेवारी रोजी रात्री पावणेदहाच्या सुमारास त्यांनी लक्ष्मी चौक, मारुंजी येथील लॉजमध्ये रूम घेतली होती. त्याठिकाणी त्यांच्यात वाद झाले. त्यानंतर रात्री उशिरा आरोपीने वंदना हिच्यावर गोळ्या झाडल्या. यामध्ये तिचा मृत्यू झाला. हल्ल्यानंतर आरोपी पळून गेला.
घटनेची माहिती मिळताच हिंजवडी पोलिसांसह गुन्हे शाखेचे पोलीस घटनास्थळी दाखल झाले. मॅनेजरकडे असलेल्या मास्टर चावीने पोलिसांनी खोलीचे कुलूप उघडले. त्यावेळी वंदनाचा मृतदेह रक्ताच्या थारोळ्यात पडला होता. दरम्यान, मुंबई पोलिसांनी पळून जाणाऱ्या आरोपीला ताब्यात घेतले आहे. या घटनेमुळे परिसरात एकच खळबळ उडाली आहे. हिंजवडी पोलीस तपास करीत आहेत.
