जळगाव मिरर | १९ मे २०२६
मुक्ताईनगर तालुक्यात तोतया पोलिसांच्या कारवायांचा धक्कादायक प्रकार समोर आला असून, दोन भामट्यांनी पोलिस असल्याचे भासवून एका वृद्ध शेतकऱ्याला गंडा घालत तब्बल ६० हजार रुपये किमतीच्या सोन्याच्या दोन अंगठ्या लंपास केल्याची घटना उघडकीस आली आहे. ही घटना रविवारी सायंकाळी सालबर्डी गावाजवळ घडली. या प्रकरणी मुक्ताईनगर पोलिस ठाण्यात गुन्हा दाखल करण्यात आला असून पोलिसांकडून आरोपींचा शोध सुरू आहे.
मिळालेल्या माहितीनुसार, सुरेश रघुनाथ बोठे (वय ६९, रा. वढवे, ता. मुक्ताईनगर) हे रविवार, १७ मे रोजी मुक्ताईनगर येथे बाजार आटोपून आपल्या दुचाकीने गावाकडे परतत होते. दुपारच्या सुमारास सालबर्डी गावाजवळील एका हॉटेल परिसरात पोहोचताच दोन अनोळखी व्यक्तींनी त्यांना अडवले. या दोघांनी स्वतःला पोलिस असल्याचे सांगत सुरेश बोठे यांची चौकशी करण्यास सुरुवात केली. अचानक अडवून चौकशी केल्याने बोठे यांच्यात संभ्रमाचे वातावरण निर्माण झाले. संशय व्यक्त करत तसेच पोलिसी धाक दाखवत आरोपींनी त्यांच्या अंगावरील दागिन्यांबाबत विचारणा केली.
दरम्यान, आरोपींनी बोठे यांच्या हातातील अंदाजे १० ग्रॅम वजनाच्या दोन सोन्याच्या अंगठ्या काढून घेतल्या. यामध्ये ६ ग्रॅम वजनाची एक अंगठी आणि ४ ग्रॅम वजनाची पुष्पराज खडा असलेली दुसरी अंगठी असा सुमारे ६० हजार रुपये किमतीचा मुद्देमाल असल्याचे सांगण्यात आले. काही क्षणांतच दोन्ही भामटे घटनास्थळावरून पसार झाले. आपली फसवणूक झाल्याचे लक्षात येताच सुरेश बोठे यांनी तातडीने मुक्ताईनगर पोलिस ठाणे गाठून फिर्याद दिली. त्यांच्या तक्रारीवरून अज्ञात आरोपींविरुद्ध गुन्हा दाखल करण्यात आला आहे. दरम्यान, परिसरात तोतया पोलिसांच्या वाढत्या हालचालींमुळे नागरिकांमध्ये भीतीचे वातावरण निर्माण झाले असून पोलिसांनी नागरिकांना सतर्क राहण्याचे आवाहन केले आहे. या प्रकरणाचा पुढील तपास पोहेकॉ. राजेश चव्हाण करत आहेत.
