जळगाव मिरर | २४ मे २०२६
यावल तालुक्यातील दहिगाव येथे ट्रॅक्टरला जोडलेल्या रोटावेटरचे काम करत असताना झालेल्या भीषण अपघातात २७ वर्षीय तरुणाचा जागीच मृत्यू झाल्याची हृदयद्रावक घटना रविवारी (दि. २३) दुपारी घडली. विशेष म्हणजे, या तरुणाचा विवाह अवघ्या काही दिवसांवर येऊन ठेपला होता. त्यामुळे गावावर शोककळा पसरली आहे.
मृत तरुणाचे नाव योगेश यशवंत पाटील (वय २८, रा. दहिगाव) असे आहे. मिळालेल्या माहितीनुसार, योगेश पाटील हा बबलू उर्फ शोभराज रमेश महाजन यांच्या मोहराळे येथील शेतात ट्रॅक्टरद्वारे रोटावेटरचे काम करण्यासाठी गेला होता. काम सुरू असताना अचानक त्याचा तोल गेला आणि तो ट्रॅक्टरच्या पुढील मोठ्या चाकाखाली सापडला. त्यानंतर तो रोटावेटरमध्ये अडकून गंभीर जखमी झाला आणि त्याचा जागीच मृत्यू झाला.
अपघाताच्या वेळी ट्रॅक्टर सुरूच असल्याने ते सरळ शेजारच्या शेतात जाऊन थांबले. ही घटना जवळच बसलेल्या एका तरुणाने पाहताच तो तत्काळ घटनास्थळी धावला आणि ट्रॅक्टर बंद केले. त्याने तातडीने आपल्या वडिलांना भ्रमणध्वनीद्वारे माहिती दिली. घटनेची माहिती मिळताच योगेशचे वडील व नातेवाईक घटनास्थळी दाखल झाले. त्यांनी तातडीने योगेशला यावल येथील ग्रामीण रुग्णालयात नेले. मात्र, वैद्यकीय अधिकाऱ्यांनी तपासणीअंती त्याला मृत घोषित केले. रुग्णालयात शवविच्छेदन करण्यात आले.
या प्रकरणी योगेशचे वडील राजेंद्र यशवंत पाटील यांनी दिलेल्या माहितीवरून यावल पोलिसात अकस्मात मृत्यूची नोंद करण्यात आली आहे. पुढील तपास पोलीस निरीक्षक रंगनाथ धारबळे यांच्या मार्गदर्शनाखाली हवालदार वसमी तडवी करत आहेत. दरम्यान, योगेश पाटील याचा विवाह अवघ्या १२ दिवसांवर येऊन ठेपला होता. १८ जून रोजी त्याचा विवाह होणार होता. मात्र, लग्नाआधीच काळाने त्याला हिरावून नेल्याने दहिगाव परिसरात शोककळा पसरली असून सर्वत्र हळहळ व्यक्त केली जात आहे.
