जळगाव मिरर । १ डिसेंबर २०२२
पत्नी दुसऱ्या बाळंपणासाठी माहेरी गेली होती. दुसरीही मुलगी झाली, याच रागातून घरी परतल्यावर पतीने तिचा खून केल्याची माहिती मिळाली आहे. यात पती-पत्नी दोघांचाही जीव गेला. आई वडिलांच्या मृत्यूने दोन्ही चिमुकल्या मुलींचे मातृ-पितृछत्र हरपल्याने सर्वत्र हळहळ व्यक्त केली जात आहे. सुरज दिलीप कुऱ्हाडे (वय-२८) असे मयत पती, तर रेश्मा सुरज कुऱ्हाडे असे मयत पत्नीचे नाव आहे.
लग्नानंतर दोन्ही मुलीच झाल्या, याचा राग डोक्यात ठेवून पतीने टोकाचं पाऊल उचललं. पत्नीच्या डोक्यात कुऱ्हाड मारुन पतीने आधी तिचा खून केला. त्यानंतर स्वत: रेल्वेखाली झोकून देत आत्महत्या केली. मन सुन्न करणारी ही घटना ३० रोजी बुधवारी सकाळी ६ वाजता जळगाव जिल्ह्यातील चाळीसगाव शहरात घडली आहे.
मिळालेली माहिती अशी की, धुळे जिल्ह्यातील जुनोने येथील रेश्मा यांचा विवाह तीन वर्षांपूर्वी सुरजशी झाला होता. तो पत्नी व मुलीसह चाळीसगाव शहरातील करगाव रोडवरील जय गणेश नगर वास्तव्याला होता. मातीकाम करुन तो आपला उदरनिर्वाह करत होता. सुरजला मुलगा व्हावा, अशी इच्छा होती. मात्र पहिली मुलगी झाल्यावर तो काहीसा खट्टू झाला होता. त्यातच त्याला दारूचे व्यसन होते. या दोन्ही कारणांवरून त्याचे पत्नी रेश्मा हिच्यासोबत नेहमीच भांडण होत असे. चार महिन्यांपूर्वीच रेश्मा दुसऱ्या बाळंपणासाठी माहेरी जुनोने येथे गेली. तिला दुसरीही मुलगीच झाली. दोन दिवसांच्या मुक्कामानंतर सुरज रेश्माला घेवून चाळीसगावला परतला.
दरम्यान, चाळीसगावात घरी परतल्यावर दोन दिवस उलटले. मंगळवारी रात्री दोन्ही मुलीच झाल्या यावरून त्याचा पत्नी रेश्मासोबत वाद झाला. या वादात त्याने रेश्माच्या डोक्यात घाव घालून खून केला. घटनेनंतर सुरज घरातून निघून गेला. बुधवारी सकाळी घराजवळ गर्दी जमली असतानाच काही वेळातच सुरजने तो राहत असलेल्या परिसरातीलच धुळे रेल्वे लाईनवर रेल्वखाली झोकून आत्महत्या केल्याची माहिती मिळाली. रेश्माच्या नातेवाईकांनी घटनास्थळ गाठून खात्री केली असता मयत हा सुरज हाच असल्याचे निष्पन्न झाले. याप्रकरणी मयत रेश्मा हिचे नातेवाईक प्रताप शांताराम गायकवाड रा. जुनोने ता. जि. धुळे यांनी दिलेल्या फिर्यादीवरून चाळीसगाव शहर पोलीस ठाण्यात गुन्हा दाखल करण्यात आला आहे. दरम्यान, पत्नीचा खून व पतीची आत्महत्या या घटनेने चाळीगाव शहर हादरले आहे. तर दुसरीकडे दोन चिमुकल्यांचे मातृ-पितृ छत्र हरपल्याने सर्वत्र या घटनेचा हळहळ व्यक्त केले जात आहे. पुढील तपास सहाय्यक पोलीस निरीक्षक दीपक बिरारी करीत आहेत.
