जळगाव मिरर | २० जून २०२६
यावल तालुक्यातील फैजपूर येथील हनुमान मंदिराजवळ असलेल्या श्री दत्त डेअरीवर आज सकाळी ८ वाजेच्या सुमारास अन्न भेसळ व प्रशासन विभागाने अचानक धाड टाकली. या कारवाईत पथकाने नमुने घेवून ते तपासणीसाठी पाठवले आहेत. त्याचा अहवाल आल्यावर योग्य कारवाई करण्यात येणार आहे.
मिळालेल्या माहितीनुसार, येथील दत्त डेअरीवर प्रामुख्याने दुधात भेसळ व खुले पनीर, दुधातील क्रीम काढून त्यात दुधात मिसळून विक्री होत असल्याची माहिती प्राप्त झाली होती. त्यावरुन या डेअरीवरील सर्व उपलब्ध पदार्थांची तपासणी करण्यात आली. त्यानंतर नमुने घेवून ते सीलबंद करून यात भेसळ आहे की नाही, याची तपासणी पुणे, नागपूर, संभाजीनगर, मुंबई या ठिकाणच्या शासकीय लॅबोरेटरी तपासणीसाठी पाठवण्यात येणार आहेत. जर त्या अहवालात भेसळ आढळून आल्यास फौजदारी कारवाईसह कायमस्वरुपी परवाना रद्द करण्याची शिफारस करण्यात येईल, असे पथकातील एका अधिकाऱ्याने सांगितले.
दरम्यान, अन्न औषध प्रशासन आयुक्त तुकाराम मुंढे यांनी भेसळ खोरांवर कारवाईसाठी महाराष्ट्रात पथके नेमली असून त्यांच्या कामगिरीचे सर्व नागरिकांकडून कौतुक होत आहे. दरम्यान, हा विभाग अॅक्शन मोडवर असून या विभागाकडून मोठ्या प्रमाणात कारवाई सुरू आहे. सर्वात महत्वाचे दुधात भेसळ असल्यास नागरिकांच्या आरोग्याचा प्रश्न निर्माण होणार आहे. दरम्यान, म्हशीच्या दुधाचे ६ फॅट व गाईचे दुधाचे फॅट ४ असणे आवश्यक आहे. हे दूध विक्री करताना भांड्यास झाकण तसेच स्वच्छता असणे गरजेचे असून तसे निर्देश अन्न भेसळ व प्रशासनाकडून देण्यात येत आहे. मात्र दत्त डेअरीवर जेव्हा तपासणी केली, तेव्हा कोणत्याही भांड्यावर झाकण नव्हते, असे निदर्शनास आले. तर दुधातील क्रीम काढून त्यात दर्जाहीन दूध मिसळून विक्री तर होत नाही, याची तपासणी केली. नागरिकांना कमी फॅटचे दूध विक्री करता येत असून यामुळे नागरिकाच्या आरोग्याचा प्रश्न निर्माण होऊ शकतो. त्यामुळे पथकातील अधिकारी व कर्मचाऱ्यांनी ही कारवाई केली. या कारवाईमुळे दुधात भेसळ करणाऱ्यांचे धाबे दणाणले आहे.
या कारवाईचा अहवाल अनुकूल येण्यासाठी अर्थपूर्ण देवाण घेवाण झाल्याची चर्चा वजा अफवा ऐकायला मिळत आहे. दरम्यान, मागील १५ दिवसांपूर्वी एका उघड्यावर तेल विक्री करणाऱ्याच्या ३ टाक्या सीलबंद करण्यात आल्या होत्या. मात्र, या मध्ये एका तेल माफियाने ५० पाकिट पोहोचवल्याची तसेच या प्रकरणातही त्यांनी मदत केल्याची चर्चा तथा अफवा संपूर्ण शहरात रंगत आहे.
