जळगाव मिरर | २७ फेब्रुवारी २०२६
मराठी भाषा, शिक्षण आणि माध्यम क्षेत्रात भरीव योगदान देणाऱ्या चार मान्यवरांना ‘मराठी अभ्यास केंद्र’तर्फे २०२४ सालचे विविध पुरस्कार जाहीर करण्यात आले आहेत. ज्येष्ठ विज्ञान प्रसारक अनंत पांडुरंग देशपांडे, प्रयोगशील शिक्षिका मधुरा राजवंशी, ज्येष्ठ पत्रकार राजेंद्र साठे आणि आदर्श शिक्षिका छाया चंद्रकांत गाडे यांची या पुरस्कारांसाठी निवड झाली आहे. पुरस्कार वितरण सोहळा रविवार, १ मार्च रोजी सकाळी १० वाजता दादर येथील शिवाजी मंदिर येथील शाहू सभागृहात पार पडणार असून, पुरस्काराचे स्वरूप रोख रक्कम व मानपत्र असे आहे.
विज्ञान प्रसारासाठी अनंत देशपांडे यांचा सन्मान
‘अधिवक्ता शांताराम दातार आणि रविंद्र सुर्वे मराठी भाषा आग्रही पुरस्कार’ अनंत पांडुरंग देशपांडे यांना जाहीर झाला आहे. अभियांत्रिकी क्षेत्रातील दीर्घ सेवेनंतर त्यांनी मराठीतून विज्ञान प्रसारासाठी अनेक दशके कार्य केले. विज्ञान विषय विद्यार्थ्यांना मातृभाषेतून शिकवल्यास संकल्पना अधिक स्पष्ट होतात, या भूमिकेतून त्यांनी सातत्याने प्रयत्न केले. मराठी विज्ञान परिषदेसह विविध संस्थांमध्ये नेतृत्व करत हजारो लेख, शेकडो व्याख्याने, आकाशवाणी-दूरदर्शन कार्यक्रम आणि पुस्तके यांद्वारे त्यांनी विज्ञान जनसामान्यांपर्यंत पोहोचवले.
प्रयोगशील शिक्षणासाठी मधुरा राजवंशी यांना गौरव
‘जयवंत चुनेकर प्रयोगशील मराठी शिक्षक पुरस्कार’ मधुरा राजवंशी यांना प्रदान करण्यात येणार आहे. फलटण येथील कमला निंबकर बालभवन या प्रयोगशील शाळेत त्या गेली १५ वर्षे अध्यापन करत आहेत. टाटा सामाजिक विज्ञान संस्थेतून प्राथमिक शिक्षणात पदव्युत्तर शिक्षण घेतलेल्या राजवंशी यांनी ग्रामीण मराठी माध्यमातील विद्यार्थ्यांसाठी इंग्रजी शिक्षण अधिक सर्जनशील आणि जीवनाभिमुख करण्यासाठी नाविन्यपूर्ण उपक्रम राबवले. २०२३-२४ मध्ये त्यांना ‘फुलब्राइट डिस्टिंग्विश्ड अवॉर्ड्स इन टीचिंग’ ही आंतरराष्ट्रीय शिष्यवृत्ती मिळाली.
पत्रकारितेतील योगदानासाठी राजेंद्र साठे यांचा सन्मान
‘दिनू रणदिवे मराठीस्नेही माध्यमकर्मी पुरस्कार’ ज्येष्ठ पत्रकार राजेंद्र साठे यांना जाहीर झाला आहे. गेली ३६ वर्षे वृत्तपत्र, दूरदर्शन आणि डिजिटल माध्यमांमध्ये संपादक व विश्लेषक म्हणून त्यांनी कार्य केले. सकाळ, लोकसत्ता, महाराष्ट्र टाइम्स तसेच ईटीव्ही मराठी आदी माध्यमांत त्यांनी नेतृत्वाची जबाबदारी सांभाळली. संपादकीय लेखन, राजकीय विश्लेषण आणि पत्रकार घडविण्याच्या कार्यात त्यांचे योगदान उल्लेखनीय मानले जाते.
आदर्श शिक्षक म्हणून छाया गाडे यांचा गौरव
‘अशोक नाना चुरी आदर्श राज्य शिक्षक पुरस्कार’ छाया चंद्रकांत गाडे यांना प्रदान करण्यात येणार आहे. विश्रांतवाडी मिल्ट्री स्कूल, अहिल्यादेवी शाळा आणि मुंबईतील पार्ले टिळक विद्यालयात तब्बल ३७ वर्षे त्यांनी अध्यापन केले; त्यापैकी सहा वर्षे मुख्याध्यापिका म्हणून कार्य केले. विद्यार्थीप्रिय, उपक्रमशील आणि मातृभाषा शिक्षणाबाबत जागरूक शिक्षिका म्हणून त्यांची ओळख आहे. निवृत्तीनंतरही त्या बालवाडी, अभ्यासवर्ग आणि पालकशाळा उपक्रमांतून सक्रिय आहेत.
मराठी भाषा, शिक्षण आणि माध्यम क्षेत्रात सातत्याने आणि परिणामकारक काम करणाऱ्या या चारही मान्यवरांचा सन्मान करून ‘मराठी अभ्यास केंद्र’ त्यांच्या कार्याचा गौरव करीत आहे. मराठी भाषेच्या संवर्धनासाठी प्रेरणादायी कार्य करणाऱ्या व्यक्तींचा सन्मान हा समाजासाठी दिशादर्शक ठरणार असल्याची भावना आयोजकांनी व्यक्त केली आहे.
