जळगाव मिरर | ६ जून २०२६
पालकमंत्री गुलाबराव पाटील यांच्या वाढदिवसानिमित्त पाळधी परिसरात विविध सामाजिक, शैक्षणिक आणि पर्यावरणपूरक उपक्रमांचे आयोजन करण्यात आले. यावेळी पाळधीसह परिसरातील सुमारे ३० हजार विद्यार्थ्यांना वह्या, पुस्तके व शैक्षणिक साहित्याचे वाटप करण्यात आले, तर दिव्यांग बांधवांना तीनचाकी सायकलींचे वितरण करून त्यांना स्वावलंबनाची नवी दिशा देण्यात आली.
जीपीएस कॅम्पस हायस्कूलच्या मैदानावर आयोजित या कार्यक्रमास मोठ्या संख्येने विद्यार्थी, पालक, नागरिक व शुभेच्छुक उपस्थित होते. मंत्री गुलाबराव पाटील यांच्या समाजसेवेच्या विचारांमधून प्रेरणा घेत त्यांच्या समर्थकांनी आणि शुभेच्छुकांनी ३० हजारांहून अधिक वह्या, शैक्षणिक साहित्य व विद्यार्थ्यांसाठी उपयुक्त वस्तू भेट देत वाढदिवसाला सामाजिक बांधिलकीची जोड दिली.
यावेळी जागतिक पर्यावरण दिनाचे औचित्य साधून प्रत्येक शुभेच्छुकाला एक झाड भेट देण्यात आले. ‘एक झाड… भावी पिढ्यांसाठी जीवनाचा श्वास’ हा संदेश देत पर्यावरण संवर्धनाची जनजागृती करण्यात आली. वाढते तापमान आणि बदलते पर्यावरणीय संतुलन लक्षात घेता पाळधी परिसरात ऑक्सिजन पार्क उभारण्याचा महत्त्वाकांक्षी संकल्पही व्यक्त करण्यात आला.
या उपक्रमांतर्गत बारा ते पंधरा फूट उंचीची मोठी झाडे लावण्यात येणार असून परिसर हिरवागार करण्यासाठी सर्व तयारी पूर्ण करण्यात आल्याचे आयोजकांनी सांगितले. भविष्यात हा ऑक्सिजन पार्क परिसरातील नागरिकांसाठी शुद्ध हवेचा स्रोत ठरणार असून पर्यावरण संवर्धनासाठीही महत्त्वाची भूमिका बजावणार आहे. शैक्षणिक मदत, दिव्यांगांना आधार आणि पर्यावरण संरक्षणाचा संदेश अशा त्रिसूत्री उपक्रमांमुळे गुलाबराव पाटील यांचा वाढदिवस सामाजिक बांधिलकी जपत साजरा करण्यात आला.
