जळगाव मिरर | २६ जून २०२४
राज्यातील अनेक शहरातून धक्कादायक घटना नेहमीच समोर येत असतांना नुकतेच कोल्हापूर जिल्ह्यातील हृदयद्रावक घटना उघडकीस आली आहे. हातकणंगले तालुक्यातील चंदूर या गावात घरासमोरील गटारीमध्ये पडून ११ महिन्याचा शौर्य सतीश पुजारी या बालकाचा दुर्देवी मृत्यू झाला. ही घटना मंगळवारी सकाळी १० वाजेच्या सुमारास घडली असून घटनेची नोंद शिवाजीनगर पोलिस ठाण्यात झाली आहे.
मिळालेल्या माहितीनुसार, चंदूर येथे अभियंता सतीश पुजारी कुटुंबीयांसह राहण्यास आहेत. त्यांचा 11 महिन्यांचा मुलगा शौर्य घरात खेळत होता. बघता बघता तो नजर चुकवून उंबरा ओलांडून घराबाहेर गेला आणि घरासमोर असलेल्या गटारीत पडला. गटारीत गाळ साचल्याने तसेच तोंडावर पडल्याने त्यामध्ये बुडाला. कुटुंबीयांनी शोधाशोध सुरू केली. घरासमोरील गटारीत तो पडल्याचे निदर्शनास आले. त्याला इंदिरा गांधी इस्पितळात दाखल करण्यात आले; मात्र उपचारापूर्वीच त्याचा मृत्यू झाल्याचे वैद्यकीय अधिकार्यांनी सांगितले. अवघ्या काही क्षणांत घडलेल्या या हृदयद्रावक घटनेने शौर्यच्या आई-वडिलांना मोठा धक्का बसला. त्यांचा आक्रोश हृदय पिळवटून टाकणारा होता. इंदिरा गांधी इस्पितळात मोठी गर्दी झाली होती. याबाबतची वर्दी वैद्यकीय अधिकार्यांनी शिवाजीनगर पोलिस ठाण्यात दिली. शौर्य याच्या मृत्यूच्या घटनेमुळे चंदूर परिसरात हळहळ व्यक्त होत आहे.
