जळगाव मिरर | २४ फेब्रुवारी २०२६
रवेर तालुक्यातील वाघोदा–सावदा मार्गावर भरधाव मोटारसायकलीने दिलेल्या जोरदार धडकेत पायी चालत असलेल्या युवकाचा जागीच मृत्यू झाल्याची दुर्दैवी घटना रविवारी सायंकाळी घडली. या घटनेमुळे परिसरात हळहळ व्यक्त होत आहे.मृत युवकाचे नाव उदय प्रभाकर पाटील (वय ४४, रा. मोठे वाघोदा, ता. रावेर) असे आहे.
मिळालेल्या माहितीनुसार, उदय पाटील हे सोमवारी सायंकाळी वाघोदा–सावदा मार्गावरील हॉटेलजवळ फेरफटका मारत असताना (एमएच १९ एबी ८४१०) क्रमांकाच्या मोटारसायकलीने त्यांना जोरदार धडक दिली. धडक इतकी भीषण होती की त्यांच्या डोक्याला गंभीर दुखापत झाली आणि त्यांचा जागीच मृत्यू झाला. अपघातानंतर स्थानिक नागरिकांनी तत्काळ घटनास्थळी धाव घेत उदय पाटील यांना सावदा ग्रामीण रुग्णालयात दाखल केले. मात्र वैद्यकीय अधिकाऱ्यांनी तपासणीअंती त्यांना मृत घोषित केले.
या प्रकरणी हर्षल प्रभाकर महाजन (वय ३७, रा. वाघोदा बुद्रुक) यांनी सावदा पोलिस ठाण्यात फिर्याद दिली आहे. फिर्यादीनुसार मोटारसायकल चालक संजय बावस्कर (रा. रोझोदा, ता. रावेर) याच्याविरुद्ध गुन्हा दाखल करण्यात आला आहे. अपघातात मोटारसायकलस्वार देखील जखमी झाला असून त्याच्यावर खासगी रुग्णालयात उपचार सुरू आहेत. पुढील तपास पोलिसांकडून सुरू आहे. उदय पाटील यांच्या पश्चात आई-वडील, पत्नी, एक मुलगा आणि एक मुलगी असा परिवार आहे. त्यांच्या आकस्मिक निधनामुळे मोठे वाघोदा परिसरात शोककळा पसरली आहे.
