जळगाव मिरर | ५ जुलै २०२६
धुळे–पारोळा राष्ट्रीय महामार्गावरील सबगव्हाण टोलनाका परिसरात शनिवारी भीषण अपघात झाला. केमिकल वाहतूक करणाऱ्या भरधाव टँकरने समोर उभ्या असलेल्या कंटेनरला मागून जोरदार धडक दिल्याने टँकरच्या पुढील भागाचे मोठे नुकसान झाले. धडकेनंतर टँकरचे टायर फुटून त्याला आग लागली. या भीषण अपघातात टँकरमधील एका व्यक्तीचा दुर्दैवी मृत्यू झाल्याची माहिती समोर आली आहे.
मिळालेल्या माहितीनुसार, जीजे-१८ बीव्ही-८३१५ क्रमांकाचा केमिकल टँकर धुळ्याकडून पारोळ्याच्या दिशेने जात होता. सबगव्हाण टोलनाक्याजवळ आल्यानंतर समोर उभ्या असलेल्या कंटेनरला टँकरने मागून जोरदार धडक दिली. धडक इतकी भीषण होती की टँकरच्या टायरने पेट घेतला आणि काही क्षणांतच वाहनातून धूर व आगीच्या ज्वाळा उसळू लागल्या. त्यामुळे परिसरात एकच खळबळ उडाली.
घटनेची माहिती मिळताच पारोळा नगरपालिकेचे अग्निशमन दल तातडीने घटनास्थळी दाखल झाले. अग्निशमन दलाच्या जवानांनी शर्थीचे प्रयत्न करून आग आटोक्यात आणली. अपघातग्रस्त वाहनात अत्यंत संवेदनशील रसायन असल्याने प्रशासनाने खबरदारीचा उपाय म्हणून महामार्गावरील दोन्ही बाजूंची वाहतूक तात्पुरती बंद केली. परिणामी महामार्गावर सुमारे अर्धा ते एक किलोमीटरपर्यंत वाहनांच्या लांबच लांब रांगा लागल्या.
प्राथमिक माहितीनुसार, टँकरमध्ये टोल्युइन डायआइसोसायनेट हे अत्यंत क्रियाशील औद्योगिक रसायन होते. या रसायनाचा वापर लवचिक पॉलीयुरेथेन फोम, औद्योगिक कोटिंग्ज, ॲडेसिव्ह्ज तसेच इलास्टोमर्सच्या निर्मितीसाठी केला जातो. अपघातानंतर केमिकल गळती होण्याची भीती व्यक्त करण्यात येत होती. मात्र प्राथमिक तपासात टँकरमधील रसायन सुरक्षित असल्याची माहिती प्रशासनाने दिली आहे. त्यामुळे मोठा अनर्थ टळल्याचे मानले जात आहे.
अपघातात मृत्यू झालेल्या व्यक्तीची ओळख पटविण्याचे काम सुरू असून, पोलिसांनी पंचनामा करून अपघाताचे नेमके कारण शोधण्यास सुरुवात केली आहे. परिस्थिती पूर्णपणे नियंत्रणात आल्यानंतर महामार्गावरील वाहतूक टप्प्याटप्प्याने पूर्ववत करण्यात येत असल्याची माहिती प्रशासनाने दिली.
