जळगाव मिरर । ३० नोव्हेबर २०२२
आज शिवप्रतापदिनानिमित्त प्रतापगडावर जय्यत तयारी करण्यात आली आहे. प्रतापगडाला फुले व भगव्या झेंड्यांनी सुशोभित करण्यात आले आहे. असंख्य शिवप्रेमी ढोल-ताशांच्या गजरात प्रतापगडावर दाखल होत आहे. त्यामुळे संपूर्ण प्रतापगड भगवेमय झाले आहे. येथील कार्यक्रमांसाठी मुख्यमंत्री एकनाथ शिंदे, उपमुख्यमंत्री देवेंद्र फडणवीसही प्रतापगडावर दाखल झाले आहेत.
इतिहासाच्या अनेक घटनांची साक्ष देणाऱ्या किल्ले प्रतापगडावर आज बुधवारी 30 नोव्हेंबर तिथीप्रमाणे शिवप्रताप दिन मोठ्या उत्साहात साजरा होत आहे. यानिमित्त प्रतापगडावर अनेक कार्यक्रमांचे आयोजन करण्यात आले आहे. गडावर आकर्षक विद्युत रोषणाईसह या वर्षीचे वेगळे आकर्षण हे लेझर शोचे असणार आहे. या लेझर शोमधून छत्रपती शिवाजी महाराजांचे आकर्षक पैलू पाहायला मिळणार आहेत. याची यशस्वी चाचणी मंगळवारी रात्री किल्ले प्रतापगडावर घेण्यात आली. या वेळी अनेक शिवभक्त उपस्थित होते. छत्रपती शिवरायांच्या शौर्याच्या गाथांमधील एक दिवस म्हणजे प्रतापगडाच्या पायथ्याला आफजल खानाचा केलेला वध. याच शौर्याचा दिवस म्हणून आज तिथीप्रमाणे शिवप्रताप दिन म्हणून प्रतापगडावर साजरा केला जातो. आज शिवरायांची प्रतिकृती असलेली पालखी देवीच्या मंदिरातून अश्वरुढ असलेल्या गडावरच्या शिवरायांच्या पुतळ्यापाशी जाते. या पालखी सोहळ्यास मुख्यमंत्री, उपमुख्यंत्र्यांसह राज्य मंत्रिमंडळातील अनेक मंत्री सहभागी असणार आहेत. तसेच, छत्रपती शिवाजी महाराजांच्या मूर्तीवर हेलिकॉप्टरने पुष्पवर्षाव करण्यात येणार आहे.
