जळगाव मिरर | ३ जुलै २०२६
जळगाव स्थानिक गुन्हे शाखेने (एलसीबी) पहाटे राबविलेल्या नियोजनबद्ध धडक कारवाईत कथित बेकायदेशीर गोवंश कत्तल प्रकरणाचा मोठा पर्दाफाश केला आहे. पारधीवाडा आणि जपान जिन परिसरातील दोन ठिकाणी एकाच वेळी छापे टाकून पोलिसांनी मोठ्या प्रमाणात संशयित गोवंश मांस, कत्तलीसाठी वापरण्यात येणारी हत्यारे व साहित्य जप्त केले. तसेच तीन जिवंत बैलांची सुटका करून त्यांना सुरक्षित गोशाळेत पाठविण्याची कार्यवाही करण्यात आली.
पोलिसांनी दिलेल्या माहितीनुसार, सकाळी ६ ते दुपारी १२ या कालावधीत ही विशेष मोहीम राबविण्यात आली. या कारवाईत घटनास्थळावरून ११ जणांना ताब्यात घेण्यात आले असून सहा संशयित घटनास्थळावरून पसार झाले आहेत. फरार संशयितांचा शोध सुरू असून त्यांच्याविरुद्धही पुढील कायदेशीर कारवाई करण्यात येत आहे.
कारवाईदरम्यान पोलिसांनी विविध वयोगटातील गोवंशाचे सुमारे १,५७५ किलो संशयित मांस जप्त केले असून त्याची अंदाजित किंमत ३ लाख १५ हजार रुपये असल्याचे सांगण्यात आले. तसेच चार लोखंडी कुऱ्हाडी, नऊ लोखंडी सुऱ्या, सहा लोखंडी कोयते, दोन वजन काटे व मापे असा कत्तलीसाठी वापरला जाणारा साहित्यही जप्त करण्यात आला. या साहित्याची अंदाजित किंमत सुमारे ३ हजार रुपये असून कत्तलखान्यातील एकूण जप्ती ३ लाख १८ हजार रुपये इतकी आहे.
याशिवाय जपान जिन परिसरातील एका पत्र्याच्या शेडमधून १२ ते १६ वर्षे वयोगटातील तीन पांढऱ्या रंगाचे गावरान बैल जिवंत अवस्थेत आढळून आले. या जनावरांची अंदाजित किंमत १ लाख ५५ हजार रुपये असून त्यांची सुरक्षित सुटका करून गोशाळेत दाखल करण्यात आले आहे. अशाप्रकारे जप्त मुद्देमाल आणि जिवंत जनावरांची एकत्रित किंमत ४ लाख ७३ हजार रुपये इतकी असल्याचे पोलिसांनी नमूद केले.
कारवाईनंतर पशुवैद्यकीय अधिकारी डॉ. संदेश वाठोरे यांना घटनास्थळी पाचारण करण्यात आले. त्यांच्या उपस्थितीत संशयित मांसाचे रासायनिक विश्लेषणासाठी (C.A.) नमुने सीलबंद करण्यात आले. उर्वरित मांस अमळनेर नगर परिषदेच्या मदतीने पंचांसमक्ष खड्डा खोदून नष्ट करण्यात आले. तसेच जिवंत जनावरांना सुरक्षित आश्रय मिळावा यासाठी गोशाळेत पाठविण्यात आले.
या प्रकरणी ताब्यात घेतलेल्या आरोपींविरुद्ध संबंधित कायद्यांनुसार गुन्हा दाखल करण्याची प्रक्रिया सुरू असून फरार संशयितांचा शोध घेण्यासाठी पोलिसांकडून विशेष पथके कार्यरत आहेत. तपास पूर्ण झाल्यानंतर न्यायालयीन प्रक्रियेत पुढील वस्तुस्थिती स्पष्ट होणार आहे.
