जळगाव मिरर | १२ जून २०२४
रावेरच्या भाजप खासदार रक्षा खडसे यांच्यासाठी बीडच्या माजी खासदार प्रीतम मुंडे यांनी भावनिक पोस्ट केली आहे. मागील 10 वर्षांमध्ये संसदेत रक्षा खडसे आणि प्रीतम मुंडे एकत्रच होत्या. त्यावेळी त्यांची मैत्री घट्ट झाली होती. केंद्रात मंत्रिपदावर विराजमान झाल्यानंतरही रक्षा खडसे यांनी प्रीतम मुंडे यांची आठवण काढली होती. आता प्रीतम मुंडे यांनीही रक्षा खडसे यांच्यासाठी खास पोस्ट केली आहे. या पोस्टची सोशल मीडियावर जोरदार चर्चा सुरु आहे.
केंद्रामध्ये नव्याने मंत्री झालेल्या रक्षा खडसे यांनी मुलाखत देताना जिवलग मैत्रीण प्रीतम मुंडे यांची आठवण काढून भावनिक झाल्याचे चित्र पाहायला मिळालं. प्रीतम मुंडे यांची आठवण काढून रक्षा खडसे यांना गहिवरून आले, आता डॉक्टर प्रीतम मुंडे यांनी रक्षा खडसे यांच्यासाठी इंस्टाग्रामवर पोस्ट केली आहे. स्वार्थी जगात आपली मैत्री दृष्ट लागण्यासारखी आहे, असे प्रीतम मुंडे यांनी इन्स्टाग्राम पोस्टमध्ये म्हटलेय.
प्रीतम मुंडे यांची नेमकी पोस्ट काय आहे ?
10 वर्ष ही खूप काही देऊन गेली , बहुतेक चांगलंच. मंत्रिपदावर विराजमान झाल्यानंतर जल्लोष साजरा करण्यापेक्षा आपली मैत्रीण संसदेत नाही म्हणून गहिवरून येणारी तू ! रक्षा ;आजच्या एवढ्या स्वार्थी जगात आपली मैत्री दृष्ट लागण्यासारखीच आहे.. पक्षातील निवडणूक निरीक्षकांना एकमेकांच्या शिफारसी करणाऱ्या, स्वतःच तिकीट जाहीर झालं की नाही यापेक्षा मैत्रिणीचं तर झालं न हे बघणाऱ्या, निकालाच्या दिवशी स्वतःचे उतार चढाव हाताळताना देखील एक नजर कायम दुसरीच्या निकालाकडे ठेवणाऱ्या. 10 वर्ष सतत संसदेत शेजारी बसणाऱ्या, पक्षाच्या बैठकांना एकत्रच जाणाऱ्या, दिल्लीत एकाच मजल्यावर राहणाऱ्या, एकमेकींना राजकीय घटनांपासून कपड्यांच्या रंगसंगतींपर्यंत सल्ले देणाऱ्या आपण . संसदेतली विधेयकांची चर्चा करणाऱ्या आपण, अनेक देवदर्शनांना देखील एकत्रच गेलो!
10 वर्षातला प्रवास तुमच्या सगळ्यांच्याच सोबतीने खूप छान झाला, पण तुझं स्थान माझ्या आयुष्यात खास होत आणि नेहमी राहील. आजच्या या स्वार्थी जगात निस्वार्थ मैत्री जपणारी माझी मैत्रीण रक्षा तुला या यशाच्या कोटी कोटी शुभेच्छा आणि तुझ्या हातून आजपर्यंत घडलं तसंच चांगलं कार्य घडो, सतत लोकसेवा तुझ्या हातून घडो हीच ईश्वरचरणी प्रार्थना
