जळगाव मिरर / २२ मार्च २०२३
जिल्ह्यात गेल्या अनेक दिवसापासून अल्पवयीन मुलांकडे गावठी कट्टे बाळगण्याचे प्रमाण दिवसेंदिवस वाढत चालले आहे. पोलीस प्रशासन नेहमीच जिल्ह्यात कारवाई करीत असताना देखील अशा या अल्पवयीन मुलांकडे असे कट्टे येतात तरी कसे हा प्रश्न नेहमीच उपस्थित होत असतो अशीच एक घटना चाळीसगाव शहरात घडली आहे. यावर पोलिसांनी कारवाई करीत तीन अल्पवयीन तरुणांकडून दोन गावठी कट्टे व दहा जिवंत काडतूस जप्त केल्याने शहरात मोठी खळबळ उडाली आहे.
चाळीसगाव शहर पोलिसांनी गोपनीय माहितीच्या आधारे हनुमानवाडी भागातील तीन अल्पवयीन तरुणांकडून दोन गावठी कट्टे व दहा जिवंत काडतूस जप्त केल्याने शहरात मोठी खळबळ उडाली आहे. ही कारवाई मंगळवारी रात्री साडेसात वाजेच्या सुमारास करण्यात आली. विशेष म्हणजे अवघ्या 15 ते 16 वयोगटातील अल्पवयीन तरुणांकडे गावठी कट्टे आले कुठून ? व ते कशासाठी याचा वापर करणार होते? असा प्रश्न आता उपस्थित होत आहे. ताब्यातील दोघे अल्पवयीन भावंडे माजी नगरसेवक पूत्र असून या कारवाईने राजकीय वर्तुळातदेखील मोठी खळबळ उडाली आहे.
हनुमानवाडी भागातील घरासमोरील हनुमान मंदिराजवळून दोघा अल्पवयीन भावंडासह आणखी एका अल्पवयीन तरुणाला मंगळवारी सायंकाळी साडेसात वाजेच्या सुमारास ताब्यात घेण्यात आले. संशयीताच्या ताब्यातून दोन गावठी कट्टे, दोन मॅग्झीन तसेच दहा जिवंत काडतूस असा एकूण 69 हजारांचा शस्त्रसाठा जप्त करण्यात आला. या प्रकरणी नाईक दीपक प्रभाकर पाटील यांच्या फिर्यादीनुसार तिघा अल्पवयीन संशयीतांविरोधात शस्त्र अधिनियमान्वये गुन्हा दाखल करण्यात आला. तपास उपनिरीक्षक सुहास आव्हाड करीत आहेत.
