जळगाव मिरर | १६ जुलै २०२६
शहरातील एमआयडीसी परिसरातील एका गोदामावर अन्न व औषध प्रशासन विभागाने टाकलेल्या धाडीत तब्बल १२ लाख १५ हजार रुपयांचा प्रतिबंधित गुटखा जप्त करण्यात आला. या कारवाईनंतर वकार शेख जब्बार शेख (वय ३२) व धीरज मिश्रा (दोघे रा. शाहू नगर, जळगाव) यांच्याविरुद्ध एमआयडीसी पोलिस ठाण्यात गुन्हा दाखल करण्यात आला असून, दोघांनाही अटक करण्यात आली आहे. या कारवाईमुळे शहरातील अवैध गुटखा साठा व वितरणाच्या रॅकेटवर मोठा आघात झाल्याचे मानले जात आहे.
अन्न व औषध प्रशासन विभागाला एमआयडीसी परिसरातील एम-१२४ सेक्टरमधील एका गोदामात मोठ्या प्रमाणात गुटखा साठवून ठेवण्यात आल्याची गुप्त माहिती मिळाली होती. या माहितीच्या आधारे सहआयुक्त (अन्न) दिनानाथ शिंदे यांच्या मार्गदर्शनाखाली अन्न सुरक्षा अधिकारी किशोर साळुंके व आकाश बोराडे यांनी संबंधित गोदामावर छापा टाकला.
तपासणीदरम्यान गोदामात मोठ्या प्रमाणात प्रतिबंधित गुटख्याचा साठा आढळून आला. कारवाईत प्रत्येकी ७५ पाऊच असलेले ‘गोवा गुटखा’चे ३,३०० पाकिटे तसेच प्रत्येकी २६ पाऊच असलेले १,५०० पाकिटे असा एकूण ४,८०० पाकिटांचा साठा जप्त करण्यात आला. या मालाची अंदाजे किंमत १२ लाख १५ हजार रुपये असल्याचे अधिकाऱ्यांनी सांगितले.
या प्रकरणी अन्न सुरक्षा अधिकारी किशोर साळुंके यांनी एमआयडीसी पोलिस ठाण्यात फिर्याद दाखल केली. त्यानुसार वकार शेख जब्बार शेख व धीरज मिश्रा यांच्याविरुद्ध संबंधित कायद्यान्वये गुन्हा नोंद करण्यात आला असून, पोलिसांनी दोघांना अटक केली आहे. या प्रकरणाचा पुढील तपास उपनिरीक्षक कृष्णा पाटील करीत आहेत.
प्राथमिक चौकशीत संबंधित आरोपींनी हा प्रतिबंधित गुटखा भाडेतत्त्वावर घेतलेल्या गोदामात साठवून ठेवल्याचे समोर आले आहे. या अवैध साठ्यामध्ये गोदाम मालकाचा कोणताही सहभाग आहे का, याचीही चौकशी करण्याची मागणी अन्न व औषध प्रशासनाने आपल्या फिर्यादीत केली आहे.
याशिवाय, या गुटखा साठ्यामागील विक्रेता, पुरवठादार, उत्पादक आणि इतर संबंधित व्यक्तींचा शोध घेऊन संपूर्ण पुरवठा साखळी उघड करण्याचे निर्देशही देण्यात आले आहेत. अवैध गुटखा विक्रीतून संघटित गुन्हेगारी आणि आर्थिक लाभाचे रॅकेट कार्यरत असल्याचे आढळल्यास संबंधितांविरुद्ध कठोर कायदेशीर कारवाई करण्यात येणार असल्याचे फिर्यादीत नमूद करण्यात आले आहे. या कारवाईमुळे जळगाव शहरातील अवैध गुटखा विक्रेत्यांमध्ये एकच खळबळ उडाली असून, आगामी काळात अशा साठेबाजांविरुद्ध धडक कारवाई सुरूच राहणार असल्याचे संकेत अन्न व औषध प्रशासनाने दिले आहेत.
