जळगाव मिरर | १५ मे २०२६
भुसावळ शहरातील ताजनगर परिसरात मोठ्या प्रमाणावर गांजा साठवून त्याची विक्री करणाऱ्या रॅकेटचा बाजारपेठ पोलिस व स्थानिक गुन्हे शाखेच्या संयुक्त पथकाने पर्दाफाश केला. या कारवाईत तब्बल २१ किलो ९७२ ग्रॅम गांजा जप्त करण्यात आला असून त्याची अंदाजे किंमत ४ लाख ३९ हजार ४४० रुपये असल्याचे पोलिसांनी सांगितले. या प्रकरणी दोन सख्ख्या भावांना अटक करण्यात आली असून आणखी दोन संशयितांचा शोध सुरू आहे.
परिविक्षाधीन पोलीस उपअधीक्षक प्रशांत दरेकर यांना ताजनगरातील तडवी वाडा परिसरातील एका घरातून गांजा साठवून विक्री केली जात असल्याची गोपनीय माहिती मिळाली होती. या माहितीच्या आधारे पोलीस निरीक्षक राहुल वाघ यांच्या मार्गदर्शनाखाली विशेष पथक तयार करण्यात आले. पथकाने संशयित शेख अजिज अब्दुल मजिद ऊर्फ अच्चू (वय ४१) यांच्या घरावर अचानक धाड टाकली.
घराची तपासणी करताना पोलिसांना दोन गोण्यांमध्ये संशयास्पद पदार्थ आढळून आला. त्यामध्ये गांजाची पाने, फुले, काड्या व बिया असल्याचे दिसून आले. फॉरेन्सिक तपासणीनंतर हा पदार्थ गांजा असल्याचे स्पष्ट झाले. इलेक्ट्रॉनिक वजन काट्यावर वजन केल्यानंतर एकूण २१ किलो ९७२ ग्रॅम गांजा जप्त करण्यात आला. या प्रकरणी शेख अजिज अब्दुल मजिद ऊर्फ अच्चू तसेच त्याचा भाऊ शेख सलीम अब्दुल मजिद (वय ४५) यांना अटक करण्यात आली आहे. प्राथमिक चौकशीत हा गांजा भोपाल आणि अकोला येथील संशयितांकडून आणण्यात आल्याची माहिती समोर आली आहे. संबंधित दोन संशयितांचा पोलीस शोध घेत आहेत.
या कारवाईमुळे ताजनगर परिसरात खळबळ उडाली असून बाजारपेठ पोलीस ठाण्यात एनडीपीएस कायद्यान्वये गुन्हा दाखल करण्यात आला आहे. पुढील तपास पोलीस उपनिरीक्षक मंगेश जाधव करीत आहेत.
