जळगाव मिरर | २० ऑक्टोबर २०२३
चोपडा तालुक्यातील नागलवडी येथील योगेश शांताराम बारेला (१९) या तरुणाने गुरुवारी सकाळी १० वाजेच्या सुमारास नागलवाडी येथील राहत्या घराच्या सऱ्याला दोर बांधून गळफास घेत आत्महत्या केली.
मिळालेल्या माहितीनुसार, चोपडा येथील महात्मा गांधी महाविद्यालयात कला शाखेत योगेश बारेला द्वितीय वर्षाचा विद्यार्थी होता. चोपडा येथील धनवाडी रोडवरील आदिवासी वसतिगृहात तो राहत होता. कालच सायंकाळी वसतिगृहातील जेवण करून तो घरी गेला. गुरुवारी सकाळी ९:३० वाजता आपल्या इन्स्टाग्रामवर ‘ऐसी औलाद किसी को न दे, जो माँ बाप को खुश ना रख सके… मिस यू मॉम, डॅड’ असे स्टेटस ठेवत त्याने आपली जीवनयात्रा संपवली. योगेशचे आई-वडील शेतकरी असून पाच बहिणींचा हा एकुलता एक भाऊ होता. चोपडा येथील उपजिल्हा रुग्णालयात त्याचे शवविच्छेदन करण्यात येऊन नागलवाडी येथे अंत्यसंस्कार करण्यात आले.
