जळगाव मिरर | २८ नोव्हेबर २०२४
राज्यात विधानसभा निकाल लागलेला असून यंदाच्या निवडणुकीत महायुतीला मोठे यश मिळाले आहे. तर महाविकास आघाडीचा सुपडा साफ झाला आहे. दोन दिवसापासून मुख्यमंत्री पदाचे नाव जाहीर झाले नसून आज जाहीर होण्याची शक्यता आहे. पण तत्पूर्वी, भाजपने नव्या सरकारमध्ये काही निवडक ज्येष्ठ नेते सोडले तर तरुण आमदारांना संधी देण्याचे संकेत दिलेत. यामुळे नवे सरकार अस्तित्वात येण्यापूर्वीच मंत्रिपदासाठी इच्छुक आमदारांची धाकधूक वाढली आहे.
भाजप नेते देवेंद्र फडणवीस, राष्ट्रवादी काँग्रेसचे अध्यक्ष अजित पवार व शिवसेना नेते एकनाथ शिंदे यांची आज दिल्लीत केंद्रीय गृहमंत्री अमित शहा यांच्यासोबत बैठक होणार आहे. या बैठकीत महाराष्ट्राच्या नव्या मुख्यमंत्र्याचे नाव निश्चित केले जाण्याची शक्यता आहे. तसेच संभाव्य मंत्रिमंडळाचा चेहराही यात स्पष्ट होण्याची शक्यता आहे. सूत्रांच्या माहितीनुसार, भाजपने नव्या सरकारमध्ये नव्या चेहऱ्यांना संधी देण्याचा निर्णय घेतला आहे. यामुळे काही ज्येष्ठ नेत्यांचे पत्ते कट होण्याची भीती निर्माण झाली आहे.
भाजपने भविष्यातील निवडणुकांत फायदा व्हावा या दृष्टिकोनातून आतापासूनच तयारी सुरू केली आहे. या अंतर्गत महायुतीच्या नव्या सरकारमध्ये तरुण नेत्यांना संधी दिली जाणार आहे. तरुण नेत्यांचा मार्ग मोकळा करण्यासाठी 50 वर्षांवरील आमदारांचा पत्ता कट केला जाणार आहे. यामुळे या आमदारांची धाकधूक वाढली आहे. यामुळे आज सकाळपासूनच देवेंद्र फडणवीस यांच्या सागर बंगल्यावर मंत्रिपदासाठी इच्छुक असणाऱ्या आमदारांची गर्दी झाली आहे. या आमदारांशी चर्चा झाल्यानंतर फडणवीस दिल्लीच्या दिशेने निघाले. विधानसभा निवडणुकीचा निकाल लागल्यानंतर लगेचच महायुतीमध्ये मंत्रिमंडळाच्या फॉर्म्युल्यावर चर्चा सुरू झाली आहे. या चर्चेतून 21 – 12 – 10 असा संभाव्य फॉर्म्युला समोर आला आहे. त्यानुसार, भाजपला सर्वाधिक 21, शिवसेनेला 12 व राष्ट्रवादी काँग्रेसला 10 मंत्रिपदे मिळण्याची शक्यता आहे.
