जळगाव मिरर | २१ डिसेंबर २०२५
राज्यातील स्थानिक स्वराज्य संस्थांच्या निवडणुकांच्या पहिल्या टप्प्यातील नगरपरिषद व नगरपंचायतींचे निकाल आज, २१ डिसेंबर रोजी जाहीर झाले. अनेक ठिकाणी महायुतीला मतदारांनी पसंती दिल्याचे चित्र असताना, जळगाव जिल्ह्यातील मुक्ताईनगर नगरपंचायतीच्या निकालाने मात्र राजकीय वर्तुळात खळबळ उडवली आहे.
मुक्ताईनगर नगरपंचायतीची निवडणूक अत्यंत चुरशीची ठरली होती. या निवडणुकीत भाजप नेत्या व केंद्रीय राज्यमंत्री रक्षा खडसे यांची प्रतिष्ठा पणाला लागली होती. भाजपकडून नगराध्यक्षपदासाठी भावना महाजन यांना उमेदवारी देण्यात आली होती, तर शिंदेसेनेकडून आमदार चंद्रकांत पाटील यांच्या कन्या संजना चंद्रकांत पाटील या रिंगणात होत्या.
निकालात संजना पाटील यांनी २५८३ मतांनी दणदणीत विजय मिळवत नगराध्यक्षपदावर आपले नाव कोरले आहे. त्यांच्या विजयानंतर समर्थकांकडून मोठ्या प्रमाणात जल्लोष करण्यात आला. या निवडणुकीसाठी रक्षा खडसे यांनी स्वतः प्रचाराची सूत्रे हाती घेतली होती. आरोप-प्रत्यारोपांच्या फैरी, टोकाची टीका आणि विविध वादांमुळे ही निवडणूक चांगलीच गाजली होती. मात्र, अखेरीस मतदारांनी संजना पाटील यांच्यावर विश्वास दाखवला.
विशेष म्हणजे, शरद पवार गटाचे ज्येष्ठ नेते एकनाथ खडसे यांनीही भाजपला पाठिंबा दिला होता. तरीदेखील झालेल्या पराभवामुळे मुक्ताईनगरचा हा निकाल खडसे परिवारासाठी राजकीयदृष्ट्या मोठा धक्का मानला जात आहे.
