जळगाव मिरर | २ जुलै २०२६
विक्रीसाठी परराज्यातून आणलेल्या गुटखा, पानमसाला, सुगंधित तंबाखू साठवून ठेवलेल्या घरावर अन्न व औषध प्रशासन विभागाच्या पथकाने छापा टाकला. याठिकाणाहहून ६१ हजार ६६४ रुपये किमतीचा साठा जप्त करण्यात आला. ही कारवाई दि. २९ जून रोजी रात्री ११ वाजता शनिपेठ परिसरात करण्यात आली. या प्रकरणी रिजवान चाहत अली, रिहान चाहत अली, चाहत अली (सर्व रा. गंगुबाई शाळेजवळ, शनिपेठ) या तीन जणांविरुद्ध शनिपेठ पोलिस ठाण्यात गुन्हा दाखल करण्यात आला आहे.
मिळालेल्या माहितीनुसार, शहरातील शनिपेठ परिसरातील गंगुबाई शाळेजवळील एका घरात प्रतिबंधीत पानमसाला, तंबाखू, सुगंधित सुपारी विक्रीसाठी साठवून ठेवल्याची माहिती अन्न व औषध प्रशासन विभागाला मिळाली. त्यानुसार अन्न व औषध प्रशासन विभागाचे अन्न सुरक्षा अधिकारी अमोल कैलास जगताप यांनी शनिपेठ पोलिसांना मदतीसाठी कळविले. त्यानुसार पोलिस निरीक्षक विशाल जायस्वाल यांनी उपनिरीक्षक नितीन पाटील, पोकॉ काजोल सोनवणे यांच्यासह संबंधित ठिकाणी पोहचले व घरावर छापा टाकला. पथकाला बघताच साठेबाजी करणाऱ्यांनी तेथून पळ काढला. दरम्यान, पथकाने घरातील महिलांना त्यांचे नावे विचारले व घरात पाहणी केली. तेथून पानमसाला, सुगंधित तंबाखू असा एकूण ६१ हजार ६६४ रुपयांचा साठा जप्त केला.
या प्रकरणी अन्न सुरक्षा अधिकारी अमोल जगताप यांनी शनिपेठ पोलिस ठाण्यात फिर्याद दिली. त्यावरून रिजवान अली, रिहान अली, चाहत अली या तिघांविरुद्ध गुन्हा दाखल करण्यात आला आहे. तपास उपनिरीक्षक प्रिया दातीर करीत आहेत.
या कारवाईदरम्यान अन्य राज्यातून पानमसाला, तंबाखूची चोरटी वाहतूक करून जळगाव शहरात पुरवठा करणाऱ्याचे नाव समोर आले आहे. त्याविषयीदेखील फिर्यादीत नमूद करण्यात आले असून त्याची चौकशी करून कारवाई करण्याचे अन्न व औषध प्रशासनाने पोलिसांना दिलेल्या फिर्यादीत नमूद केले आहे.
