जळगाव : प्रतिनिधी
महावितरणचा अधिकारी बोलतोय म्हणत एकाला चार लाखात गंडवल्याप्रकरणी जळगाव सायबर पोलिसात एका अज्ञात व्यक्तीविरुद्ध गुन्हा दाखल करण्यात आला आहे. जगदीश प्रीतमदास जेठवानी (वय ४०, व्यवसाय – व्यापार, रा.वैभव कॉलोनी, गणपती नगर जळगाव) यांनी याबाबत तक्रार नोंदवली आहे.
या संदर्भात अधिक असे की, दि. १७ ऑगस्ट रोजी दुपारी ४:३० वाजेच्या सुमारास ८६७००७३९७५ या नंबरवरून अज्ञात व्यक्तीने जगदीश जेठवानी यांच्या पत्नीच्या मोबाईलवरील व्हाट्सअपद्वारे मेसेज पाठवले. मेसेजमध्ये आपण महावितरणचे इलेक्ट्रिक ऑफिसर असल्याची बतावणी त्याने केली. तसेच वीज बिल भरणे कामी एक लिंक असलेले बनावट वेबपेज त्यांना पाठवले. सदर बनावट वेबपेज हे महावितरण कंपनीचे असल्याचे भासवून त्यांच्या एचडीएफसी बँक खात्याची सर्व माहिती अपद्वारे प्राप्त करून जगदीश जेठवानी यांच्या एचडीएफसी बँक खात्यातून वेळोवेळी एकूण ३ लाख ९६ हजार ६०९ रुपये इलेक्ट्रोनिक माध्यमाचा वापर करून ऑनलाईन बँकिगद्वारे वळवले. पैसे डेबिट झाल्याचे बँकेचे आलेले मेसेज आल्यानंतर जेठवानी यांनी सायबर पोलिसात धाव घेत गुन्हा दाखल केला असून पुढील तपास पोनि. लीलाधर कानडे हे करीत आहेत.
