जळगाव मिरर | १९ मे २०२६
अंकलेश्वर–बऱ्हाणपूर राष्ट्रीय महामार्गावर फोटोग्राफरला अडवून बेदम मारहाण करत त्याच्या कारची तोडफोड करून महागडे कॅमेरे व साहित्य लांबवल्याप्रकरणी यावल पोलिसांनी वेगाने कारवाई करत दोन अल्पवयीनांसह सहाजणांना ताब्यात घेतले आहे. अटक करण्यात आलेल्या चौघांना न्यायालयाने चार दिवसांची पोलिस कोठडी सुनावली असून फरार आरोपींचा शोध सुरू आहे.
याबाबत अधिक माहिती अशी की, बुधवारी रात्री एचपी पेट्रोल पंपाजवळ ही धक्कादायक घटना घडली. अनिकेत नंदा जाधव (वय २१, रा. मिलिंद नगर, जामखेड) हा फोटोग्राफर आपल्या कारने प्रवास करत असताना दुचाकीला कट लागल्याच्या कारणावरून त्याचा काही युवकांशी वाद झाला. किरकोळ वादाचे रूपांतर काही क्षणांतच हिंसक हल्ल्यात झाले. वादानंतर १५ ते २० जणांच्या जमावाने अनिकेत जाधव याला रस्त्यात अडवून बेदम मारहाण केली. यावेळी संतप्त जमावाने त्याच्या कारच्या काचा फोडून मोठी तोडफोड केली. तसेच कारमध्ये ठेवलेले महागडे कॅमेरे व फोटोग्राफीचे साहित्यही लंपास करण्यात आले. या घटनेमुळे परिसरात काही काळ तणावाचे वातावरण निर्माण झाले होते.
घटनेची माहिती मिळताच यावल पोलिसांनी तात्काळ तपासाची सूत्रे हलवत संशयितांचा शोध सुरू केला. तपासादरम्यान पोलिसांनी सैय्यद अलताफ, सैय्यद शहादत, शेख दानिश आणि शेख तन्वीर यांच्यासह दोन अल्पवयीन मुलांना ताब्यात घेतले. अल्पवयीन आरोपींना पुढील कार्यवाहीसाठी त्यांच्या पालकांच्या ताब्यात देण्यात आले आहे.
दरम्यान, अटक करण्यात आलेल्या चार आरोपींना न्यायालयात हजर केले असता न्यायालयाने त्यांना १९ मेपर्यंत पोलिस कोठडी सुनावली. या प्रकरणातील इतर फरार आरोपींचा शोध सुरू असून, पोलिस निरीक्षक रंगनाथ धारबळे यांच्या मार्गदर्शनाखाली पुढील तपास सुरू असल्याची माहिती पोलिसांनी दिली.
