जळगाव मिरर | २३ मे २०२६
बोदवड परिसरातील कायदा-सुव्यवस्था राखण्यात गंभीर हलगर्जीपणा आणि कर्तव्यात कसूर केल्याचा ठपका ठेवत बोदवड पोलीस ठाण्याचे प्रभारी अधिकारी सहाय्यक पोलीस निरीक्षक दीपक सुरवडकर यांच्यासह तीन पोलीस अधिकारी-कर्मचाऱ्यांना तडकाफडकी निलंबित करण्यात आले आहे. या धडक कारवाईमुळे जळगाव पोलीस दलात मोठी खळबळ उडाली आहे. निलंबित करण्यात आलेल्यांमध्ये टाऊन बीट प्रभारी एएसआय रवींद्र गुरचल तसेच पोलीस कॉन्स्टेबल नंदकिशोर धनके यांचा समावेश आहे. संवेदनशील वादाकडे दुर्लक्ष केल्यामुळे पुढे घडलेल्या खूनप्रकरणाच्या पार्श्वभूमीवर वरिष्ठांनी ही कठोर कारवाई केली आहे.
मिळालेल्या माहितीनुसार, १ मे रोजी बोदवड पोलीस ठाण्यात दाखल झालेल्या एका गुन्ह्यातील फिर्यादी पक्षांमध्ये तीव्र वाद निर्माण झाला होता. या वादातून पुढे एक अदाखलपात्र गुन्हाही नोंदविण्यात आला होता. दोन्ही गटांतील वाढते वैमनस्य लक्षात घेता, परिस्थिती नियंत्रणात ठेवण्यासाठी प्रतिबंधक कारवाईची जबाबदारी पोलीस कॉन्स्टेबल नंदकिशोर धनके यांच्याकडे सोपवण्यात आली होती. मात्र, त्यांनी प्रकरणाचे गांभीर्य न ओळखता कोणतीही ठोस चौकशी अथवा प्रतिबंधक उपाययोजना न केल्याने दोन्ही बाजूंमधील तणाव वाढत गेला.
दरम्यान, १९ मे रोजी हिदायत नगर परिसरात दोन्ही गटांमध्ये पुन्हा वाद सुरू असल्याची माहिती पोलिसांना मिळाली. त्यानंतर टाऊन बीट प्रभारी एएसआय रवींद्र गुरचल हे अन्य कर्मचाऱ्यासह घटनास्थळी पोहोचले. दोन्ही गटांतील पूर्वीच्या वादाची पूर्ण माहिती असतानाही संबंधितांना ताब्यात घेणे किंवा कायदेशीर प्रतिबंधक कारवाई करणे अपेक्षित होते. मात्र, त्यांनी केवळ समज देऊन दोन्ही पक्षांना सोडून दिल्याचे समोर आले आहे.
याच निष्काळजीपणाचा परिणाम म्हणून २१ मे रोजी दोन्ही गटांमधील वादाने हिंसक वळण घेत एकाचा निर्घृण खून झाला. विशेष म्हणजे, या गंभीर परिस्थितीची माहिती स्थानिक नगरसेवक आणि काही पोलीस कर्मचाऱ्यांनी फोन तसेच व्हॉट्सअॅपद्वारे प्रभारी अधिकारी सपोनि दीपक सुरवडकर यांना दिली होती. मात्र, माहिती मिळूनही त्यांनी स्वतः कोणतीही कारवाई केली नाही किंवा अधीनस्थांना आवश्यक सूचना दिल्या नाहीत. तसेच वरिष्ठ अधिकारी आणि नियंत्रण कक्षालाही याबाबत माहिती देण्यात आली नसल्याचे चौकशीत समोर आले. पोलीस ठाण्याचे प्रमुख म्हणून कायदा-सुव्यवस्था राखण्यात अपयशी ठरल्याचा ठपका ठेवत वरिष्ठ कार्यालयाने अखेर दीपक सुरवडकर, रवींद्र गुरचल आणि नंदकिशोर धनके यांच्यावर निलंबनाची कठोर कारवाई केली आहे. या घटनेमुळे जिल्ह्यातील पोलीस प्रशासनात मोठी चर्चा रंगली आहे.
