जळगाव मिरर | ८ नोव्हेबर २०२३
आगामी दिवाळी व पुढील महिन्यातील नाताळ सणानिमित्त प्रवाशांची होणारी गर्दी लक्षात घेता मध्य रेल्वेने बुधवार, ८ नोव्हेंबरपासून सुरत-ब्रह्मपूर साप्ताहिक विशेष गाडी चालविण्याचा निर्णय घेतला आहे. मध्य रेल्वेच्या प्रवाशांसाठी आनंदाची बातमी दिली आहे. ही गाडी भुसावळमार्गे धावणार असल्याने जिल्ह्यातील प्रवाशांना लाभ होणार आहे.
या गाडीच्या अप व डाउन अशा प्रत्येकी आठ फेऱ्या होणार असून, डिसेंबरअखेरपर्यंत ही रेल्वे धावणार आहे. ०९०६९ सुरत-ब्रह्मपूर विशेष एक्स्प्रेस ८ नोव्हेंबर ते २७ डिसेंबर या कालावधीत सुरत स्थानकावरून प्रत्येक बुधवारी दुपारी २:२० वाजता सुटेल व शुक्रवारी ब्रह्मपूर येथे रात्री १:१५ वाजता पोहोचेल. ही गाडी अकोला स्थानकावर बुधवारी रात्री ९:३२ वाजता येईल. परतीच्या प्रवासात ०९०७० ब्रह्मपूर- सुरत एक्स्प्रेस १० नोव्हेंबर ते २९ डिसेंबर या कालावधीत ब्रह्मपूर स्थानकावरून प्रत्येक शुक्रवारी पहाटे ३:३० वाजता सुटेल व सुरत येथे शनिवारी दुपारी १:४५ वाजता पोहोचेल. ही गाडी अकोला स्थानकावर शनिवारी पहाटे ४:३९ वाजता येणार आहे.
