जळगाव मिरर | २२ मे २०२६
भुसावळ ते जामनेर रोडवरील चोरवड गावाजवळील मंगल वस्ताद ढाब्यासमोर मंगळवारी (दि.२०) सायंकाळी झालेल्या भीषण अपघातात दुचाकीस्वाराचा जागीच मृत्यू झाल्याची दुर्दैवी घटना घडली. या अपघातात तालुक्यातील मोंढाळा येथील मनोज पांडुरंग वाघ (वय ४०) यांचा मृत्यू झाला असून परिसरात हळहळ व्यक्त होत आहे.
मिळालेल्या माहितीनुसार, मनोज वाघ हे आपल्या दुचाकीने (एमएच-१९, ईजी-३२३४) भुसावळकडून कुन्हा पानाच्या मार्गे जात होते. दरम्यान, चोरवड गावाजवळील मंगल वस्ताद ढाब्यासमोर भुसावळच्या दिशेने भरधाव वेगाने जाणाऱ्या डंपरने (एमएच-१९, झेड-४९११) त्यांच्या दुचाकीला जोरदार धडक दिली. धडक इतकी भीषण होती की, मनोज वाघ यांचा जागीच मृत्यू झाला. अपघाताची माहिती मिळताच परिसरातील नागरिकांनी घटनास्थळी मोठी गर्दी केली. घटनेची माहिती मिळाल्यानंतर पोलिसांनी घटनास्थळी धाव घेत पंचनामा केला. मृतदेह पुढील वैद्यकीय प्रक्रियेसाठी पाठविण्यात आला.
मयत मनोज वाघ हे मोंढाळा गावात सलून व्यवसाय करत होते. ते कुटुंबातील कमावते सदस्य असल्याने त्यांच्या अकाली निधनामुळे कुटुंबावर दुःखाचा डोंगर कोसळला आहे. त्यांच्या पश्चात आई-वडील, पत्नी, मुलगा व मुलगी असा परिवार आहे. दरम्यान, रात्री उशिरापर्यंत भुसावळ तालुका पोलीस ठाण्यात गुन्हा दाखल करण्याची प्रक्रिया सुरू होती. या प्रकरणाचा पुढील तपास पोलीस हेड कॉन्स्टेबल धनराज मंडलिक करीत आहेत.
