जळगाव मिरर | १८ मार्च २०२६
रावेर तालुक्यातील वडगाव परिसरात चोरीस गेलेला तब्बल ३ लाख ५० हजार रुपये किमतीचा डिझेल जनरेटर हस्तगत करत चोरट्यांना जेरबंद करण्यात रावेर पोलिसांनी उल्लेखनीय कामगिरी बजावली आहे. या धडाकेबाज कारवाईबद्दल संबंधित पोलीस पथकाचा सन्मानपत्र देऊन गौरव करण्यात आला.
काही दिवसांपूर्वी रावेर पोलीस ठाण्यात नव्याने रुजू झालेल्या सहाय्यक पोलीस निरीक्षक मीरा देशमुख यांच्या नेतृत्वाखाली पोलीस उपनिरीक्षक अभय ढाकणे, पोलीस हेडकॉन्स्टेबल अविनाश पाटील तसेच पोलीस कॉन्स्टेबल सुभाष शिंदे आणि किरण जाधव यांनी पोलीस उपअधीक्षक (फैजपूर विभाग) अनिल बडगुजर यांच्या मार्गदर्शनाखाली सापळा रचला.
या कारवाईदरम्यान वडगाव येथून चोरीस गेलेला डिझेल जनरेटर चोरट्यांकडून हस्तगत करण्यात आला. पोलिसांनी मुद्देमालासह आरोपींना तात्काळ ताब्यात घेत अटक केली. या यशस्वी कारवाईमुळे परिसरात पोलिसांच्या कामगिरीचे कौतुक होत आहे. दरम्यान, या उल्लेखनीय कामगिरीची दखल घेत जिल्हा पोलीस अधीक्षक महेश्वर रेड्डी यांनी संबंधित पोलीस पथकाचा सन्मानपत्र देऊन सत्कार केला. यावेळी अप्पर पोलीस अधीक्षक अशोक नखाते यांचीही उपस्थिती होती.
तसेच निंभोरा येथील शांतता समिती सदस्य, पोलीस पाटील, पत्रकार, पोलीस मित्र व सामाजिक कार्यकर्त्यांनीही या पथकाचे अभिनंदन करत त्यांच्या कार्याचे कौतुक केले. या कारवाईमुळे परिसरातील गुन्हेगारीवर आळा बसण्यास मदत होणार असल्याचे बोलले जात आहे.
