जळगाव : प्रतिनिधी
विद्यार्थ्यांच्या प्रलंबित स्वाधार योजनेचे पैसे पात्र विद्यार्थ्यांना मिळावे व विद्यार्थ्यांची प्रलंबित शिष्यवृत्ती त्यांच्या खात्यात वर्ग करण्यासंदर्भात काल दिनांक 30 ऑगस्ट रोजी सत्यशोधक विद्यार्थी संघटना जळगाव तर्फे सहाय्यक आयुक्त, सामाजिक न्याय भवन, समाज कल्याण विभाग, जळगाव, यांना निवेदन सादर करण्यात आले.
सविस्तर वृत्त असे की, भारतरत्न डॉ. बाबासाहेब आंबेडकर स्वाधार योजना शैक्षणिक वर्ष 2020-21 आणि 2021-22 चा काही मोजक्याच विद्यार्थ्यांना पहिला हप्ता मिळाला असून अद्याप काही विद्यार्थ्यांना पहिला हप्ता देखील मिळालेला नाही. तसेच मागील शैक्षणिक वर्ष संपून पुढील शैक्षणिक वर्ष सुरू झाले असून अद्याप विद्यार्थी स्वाधार योजनेच्या लाभाच्या प्रतीक्षेत तात्काळत उभे आहेत. त्यामुळे विद्यार्थ्यांची आर्थिक व मानसिक कुचंबना होत असून वरील सर्व बाबींचा विचार करून लवकरात लवकर विद्यार्थ्यांना न्याय मिळावा या आशयाचे निवेदन सत्यशोधक विद्यार्थी संघटना जळगाव तर्फे सहायक आयुक्त, सामाजिक न्याय भवन, समाज कल्याण विभाग, जळगाव यांना देण्यात आले.
महाविद्यालयीन विद्यार्थ्यांचे महा डीबीटी वरील सर्व प्रकारची शिष्यवृत्ती अद्याप विद्यार्थ्यांना मिळाली नाही. तरी लवकरात लवकर विद्यार्थ्यांच्या खात्यात ती वर्ग करण्यात यावी अशी विनंती केली. सदर मागण्यांचा गांभीर्यपूर्वक विचार केला गेला नाही तर सत्यशोधक विद्यार्थी संघटनेतर्फे तीव्र स्वरूपाच्या आंदोलनाच इशारा देण्यात आला. दिवेदन देते वेळी अविनाश तायडे, सुश्मिता भालेराव, अजय पाटील, चंचल संगीता सुनील धांडे, नेहा पवार, दिनेश राठोड, केतन शिरतुरे, योगीता पाटील, तुषार भटकर, सावन डिवरे, मयूर साळवे, प्रतीक झनके, तथागत सुरवाडे , विजय बोदडे, करण तामसरे आदी उपस्थित होते .
