जळगाव मिरर | २० नोव्हेंबर २०२३
गणितातील जगप्रसिद्ध प्राध्यापक, सुपर थर्टीचे जनक, तसेच गरीब, गरजू व होतकरू विद्यार्थ्यांचे उच्चशिक्षणाचे स्वप्न फुलविणारे व त्यांचे करिअर घडविणारे पद्मश्री मा. आनंदकुमारजी, पटना यांच्या हस्ते एसडी-सीड शिष्यवृत्ती वितरण आज सायं. ४.३० वाजता छत्रपती संभाजी राजे नाट्य मंदिर, जळगाव येथे होणार आहे. या दरम्यान त्यांच्या प्रेरणादायी, अद्भूत आणि करिअरला नवीन दिशा देणाऱ्या जीवन प्रवासाचा पट प्रकट मुलाखतीद्वारे प्रसिद्ध निवेदिका, मुलाखतकार तसेच प्रेक्षकांचा सुसंवादिनी हा उस्फूर्त किताब प्राप्त असलेल्या सौ. मंगला खाडिलकर या उलगडणार आहे.
गणितातील जगप्रसिद्ध प्राध्यापक, सुपर थर्टीचे जनक, तसेच गरीब, गरजू व होतकरू विद्यार्थ्यांचे उच्चशिक्षणाचे स्वप्न फुलविणारे व त्यांचे करिअर घडविणारे पद्मश्री मा. आनंदकुमारजी, पटना यांच्या हस्ते एसडी-सीड शिष्यवृत्ती वितरण आज सायं. ४.३० वाजता छत्रपती संभाजी राजे नाट्य मंदिर, जळगाव येथे होणार आहे.
· इंजिनीअरिंग, मेडीकल तसेच इतर प्रकारचे उच्च शिक्षण घेऊ इच्छिणाऱ्या विद्यार्थ्यांनी नेमके काय केले पाहिजे.
· गुणवत्तापूर्ण अभ्यास कसा करावा.
· यशस्वी विद्यार्थ्यांची मानसिकता कशी असायला हवी.
‘डिनर विथ आनंदकुमार ‘
कार्यक्रमाला आलेल्या विदयार्थ्यांनी QR Code स्कॅन करून छोटासा गुगल फॉर्म भरायचा असून त्यातील निवडक पाच विदयार्थ्यांना आनंदकुमार यांचे सोबत डिनर घेण्याची संधी मिळणार आहे
मा. आनंद कुमार एकनिष्ठ व समर्पित असे गणित या विषयाचे शिक्षक की जे “सुपर थर्टी” या प्रणाली साठी नावाजले आहेत. डॉ.आनंद कुमार यांचा जन्म एक जानेवारी 1973 रोजी पटना (बिहार) येथे आर्थिक परिस्थितीने साधारण अशा कुटुंबात झाला. त्यांचे वडील पोस्ट खात्यात नोकरी करीत होते. आनंद कुमार यांचे शिक्षण पटना येथील हिंदी मिडीयम च्या सरकारी शाळेत झाले. शाळेत असतानाच त्यांच्यामध्ये गणित या विषयाची आवड निर्माण झाली. गणित या विषयातील उच्च शिक्षण घेत असतानाच त्यांचे ‘नंबर थिअरी’ मधील शोधनिबंध ‘स्पेक्ट्रम’ या अतिशय नावाजलेल्या गणित मॅगझिनमध्ये प्रकाशित झाले. त्यांना केंब्रिज विद्यापीठात पुढील शिक्षणासाठी प्रवेश मिळाला होता परंतु वडिलांचे निधन व साधारण आर्थिक परिस्थिती यामुळे तेथे जाऊ शकले नाही. 1992 साली त्यांनी गणित विषय शिकवायला प्रारंभ केला. त्यासाठी त्यांनी महिना 300 रुपये भाड्याची एक खोली घेतली तेथेच त्यांनी आपले स्वतःचे “रामानुजन स्कूल ऑफ मॅथमॅटिक्स” सुरू केले. सदर संस्थेत सुरुवातीला फक्त दोन विद्यार्थी प्रविष्ट झाले, परंतु संस्थेने उंच भरारी घेत केवळ तीन वर्षातच प्रविष्ट विद्यार्थ्यांची संख्या सुमारे 500 पर्यंत गेली. दरम्यान ज्या गरीब विद्यार्थ्यांना आय.आय.टी. च्या प्रवेश परीक्षेची तयारी करायची होती, परंतु गरीबी मुळे ते फी भरु शकत नव्हते.असे काही विद्यार्थी त्यांच्या संपर्कात आले. गरीबी मुळे काही हुशार व होतकरू विद्यार्थी या परीक्षेपासून व शिक्षणापासून वंचित राहतात.त्यांचे आयुष्य गरिबीमुळे उध्वस्त होते. आपण अशा गरीब पण हुशार होतकरू विद्यार्थ्यांसाठी काही तरी ठोस पाऊल उचलल पाहिजे असा निर्धार त्यांनी केला व यातूनच जगप्रसिद्ध सुपर ३० या संकल्पनेची निर्मिती झाली.
आनंद कुमार यांच्या या थोर कार्याचा सन्मान देशातील व विदेशातील अनेक संस्थांनी केला. काही महत्त्वाचे पुरस्कार येथे नमूद करीत आहोत.
· २०१८ – दुबई येथील मलबार गोल्ड अँड डायमंड द्वारा “ग्लोबल एज्युकेशन अवॉर्ड 2018”
· २०१८ – भगवान महावीर फाउंडेशन तर्फे शैक्षणिक क्षेत्रात उत्कृष्ट कार्याबद्दल “महावीर पुरस्कार”
· २०१९ – कॅलिफोर्निया येथील फाउंडेशन फॉर एक्सलन्स(FFE) या संस्थेने “एज्युकेशन एक्सलन्स अवॉर्ड 2019
· २०२२ – “गणित रत्न” पुरस्कार
· २०२३ – भारत सरकारने साहित्य व शिक्षण क्षेत्रातील योगदान बद्दल “पद्मश्री ” देऊन गौरविले.
डॉ.आनंद कुमार यांचे कार्य व चरित्र इतके महान व उल्लेखनीय आहे की त्याची भारतीय फिल्म इंडस्ट्रीने सुद्धा दखल घेतली . त्यांचे कार्य व योगदान सिनेमाच्या माध्यमातून सामान्य जनतेपर्यंत पोहोचविले 2019 मध्ये दिग्दर्शक विकास भाई यांनी “सुपर थर्टी” हा चित्रपट आनंद कुमार यांच्या जीवन व कार्यावर प्रसारित केला. या चित्रपटात आनंदकुमार यांची भूमिका हृतिक रोशन या नावाजलेल्या कलाकाराने उत्कृष्ट साकारली आहे.
सदर कार्यक्रम सर्वांसाठी खुला असणार असून विद्यार्थी, पालक, शिक्षक व प्राध्यापक, विद्यार्थी चळवळीशी संबंधित शिक्षणप्रेमीनी या सोहळ्यास उपस्थित राहावे, असे आवाहन एसडी-सीड अध्यक्षा सौ. रत्नाभाभी जैन, कार्याध्यक्षा श्रीमती मीनाक्षी जैन, गव्हर्निग बोर्ड चेअरमन डॉ. प्रसन्नकुमार रेदासनी यांनी केले आहे.