जळगाव : प्रतिनिधी
शहरातील रामेश्वर कॉलनीतील मुख्य रस्त्यावर पुढच्या बाजुला शिवसेनेच्या संपर्क कार्यालय आणि मागच्या बाजुला सट्टा मटका खेळला जात असल्याचा धक्कादायक प्रकार उघडकीस आला. विशेष म्हणजे शिवसेनेच्या महिला आघाडीच्या माजी शहरप्रमुख शोभाताई चौधरी यांनी या सट्टापेढीचा भांडाफोड केला. परंतू पोलिसांनी मात्र, ही कारवाई आपण केल्याची केली नोंद केली आहे.
शिवसेनेशी संबंधीत लोक सट्टापेढी चालवत असल्याचा आरोप
रामेश्वर कॉलनीमध्ये कल्याण मटका नावाचा हा सट्टा चालवला जात होता. शोभाताई चौधरी यांनी सोमवारी दुपारी तिथे जाऊन अचानक छापा टाकला. सट्ट्याची नोंद करण्यासाठी वापरल्या जाणाऱ्या चिठ्ठया आणि अन्य साहित्य त्यांनी रस्त्यावर आणून फेकले. चौधरी यांच्याच भागात हे शिवसेनेचे संपर्क कार्यालय आहे. त्यात आतमध्ये खुलेआम सट्टा मटका सुरु होता. यामध्ये टाईम बाजार, मिलन डे -नाईट, कल्यान मटका आदींचे काळे प्लॅस्टिकचे टांगते बोर्ड लावण्यात आले होते. हा मटक्याचा अड्डा ठाकरेंच्या शिवसेनेशी संबंधीत लोक चालवत असल्याचा आरोप चौधरी यांनी केला आहे.
महिला, मुलींची छेड काढतात
तसेच इथे सट्टा लावायला येणारी माणसे परिसरातील महिला, मुलींची छेड काढतात, महिलांना त्याचा त्रास होतो. त्याबाबत महिलांनी तक्रारी केल्यामुळे आपण इथे आल्याचे चौधरी यांनी सांगितले. शिवसेना कार्यालयाच्या आश्रयाने हे धंदे करून शिवसेनाप्रमुख बाळासाहेब ठाकरे यांना बदनाम केले जात असल्याचा आरोपही त्यांनी केला. त्यानंतर तिथूनच फोन लावून त्यांनी पोलिसांना तिथे बोलावले. पोलिसांनी पंचनामा करून साहित्य जप्त केले.
दोघांविरुद्ध गुन्हा !
दुसरीकडे मात्र, एमआयडीसी पोलिस ठाण्यात दाखल गुन्ह्यात वेगळीच नोंद करण्यात आली आहे. कल्याण मटका नावाचा सट्टा सुरू असल्याची माहिती एमआयडीसी पोलिस ठाण्याचे निरीक्षक प्रताप शिकारे यांना मिळाली. त्यावरून त्यांनी पोलिस नाईक अतुल वंजारी, इम्रान सय्यद, सुधीर सावळे यांच्यासह पथक पाठवले. तिथे अनिल लक्ष्मण माळी (वय ४३, रा. मोठा माळीवाडा, पाळधी, ता. धरणगाव) हा सट्टा जुगाराच्या चिठ्ठयांवर आकडे लिहिताना आढळून आला. त्याच्याकडून ८६० रुपये व आकडे लिहलेल्या १० चिठ्ठया पोलिसांनी हस्तगत केल्या. त्याची चौकशी केली असता त्याने जुगाराचे आकडे जावेद शेख सलीम यांच्यासाठी घेत असल्याचे सांगितले, असे पोलिस नाईक सचिन किरण पाटील यांनी दिलेल्या फिर्यादीत म्हटले आहे. जावेद शेख सलिम व अनिल लक्ष्मण माळी या दोघांविरुद्ध गुन्हा दाखल करण्यात आला आहे.
