जळगाव मिरर | १३ डिसेंबर २०२५
मुंबईत पोलिस असलेल्या मावस काकाने अल्पवयीन पुतणीवर अत्याचार केल्याची माणूसकीला काळीमा फासणारी घटना समोर आली आहे. यातून ती मुलगी गर्भवती राहिली, तर हा प्रकार उघडकीस आल्यावर तिचा गर्भपातही करण्यात आला. या प्रकरणी संशयित काकाविरुध्द पाचोरा पोलिस ठाण्यात गुन्हा दाखल आरोपी फरार झाला आहे. तर करण्यात आला असून संशयित गर्भपात करणाऱ्या डॉक्टरला अटक करण्यात आली आहे.
सविस्तर वृत्त असे कि, पाचोरा तालुक्यातील एका गावात आजी आजोबांसोबत राहणाऱ्या अल्पवयीन मुलीवर मुंबई येथे पोलिस दलात असलेल्या मावस काकाने मे व जून २०२५मध्ये अत्याचार केलेत. तर याची वाच्यता केल्यास तुला पोलिस होऊ देणार नाही, अशी धमकी दिली. दरम्यान, ऑक्टोबर महिन्यात त्या मुलीला उलट्यांचा त्रास होऊ लागला. याबाबत तिने आजीला माहिती दिली. आजीने तिला पाचोरा येथे आणून सोनोग्राफी केली. त्यावेळी ती गर्भवती असल्याचे निष्पन्न झाले. तर, पीडितेच्या आईच्या संमतीने त्या मुलीचा डॉक्टरने गोळ्या देऊन गर्भपात घडवून आणला. दरम्यान, या मुलीनेच जळगाव येथील महिला दक्षता समितीला व्हॉट्सअॅप मेसेज करुन मदतीची अपेक्षा व्यक्त केली.
तर महिला दक्षता समितीने पाचोरा येथील पोलिसांना ही घटना कळवली. दरम्यान, ८ डिसेंबरला या मुलीस पाचोरा पोलिस ठाण्यात बोलावून घेण्यात आले. त्यानंतर तिच्याकडून रितसर फिर्याद नोंदवून घेण्यात आली. यानंतर गर्भपात करणाऱ्या डॉक्टरला अटक करण्यात आली आहे. तर संशयित आरोपी हा फरार झाला असून पाचोरा पोलिस त्याचा शोध घेत आहेत. या प्रकरणाचा तपास पो.नि. राहुलकुमार पवार यांच्या मार्गदर्शनात पो.उ.नि. कृष्णा घायाळ करत आहेत.
