जळगाव मिरर | १२ मे २०२६
शहरातील रोझलँड इंग्र्लीश मिडीयम स्कूलमध्ये रविवार, दि. १० मे २०२६ रोजी सौर ऊर्जा प्रकल्पाचे उद्घाटन उत्साहपूर्ण वातावरणात पार पडले. “प्रा. श्री. आर. डी. वायकोळे यांच्या स्मृतीस कृतज्ञता आणि प्रेरणेने समर्पित” या भावनेतून उभारण्यात आलेल्या या उपक्रमाचे उद्घाटन श्री. संतोष प्रधान यांच्या हस्ते करण्यात आले. यावेळी डॉ. मिलिंद वायकोळे यांच्यासह विविध क्षेत्रातील मान्यवर उपस्थित होते.
सदर सौर ऊर्जा प्रकल्प हा सॅनरोझ फाउंडेशन आणि डॉ. मिलिंद वायकोळे यांच्या संयुक्त पुढाकारातून साकारण्यात आला असून विद्यालयाच्या अध्यक्षा सौ. रोजमिन खिमानी प्रधान यांच्या संकल्पनेतून या प्रकल्पाला मूर्त स्वरूप प्राप्त झाले. कार्यक्रमात सौर ऊर्जा ही काळाची गरज असल्याचे सांगत पर्यावरण संवर्धनासाठी अशा उपक्रमांचे महत्त्व अधोरेखित करण्यात आले.
प्रा. आर. डी. वायकोळे हे शासकीय तंत्रनिकेतन महाविद्यालयात प्राध्यापक म्हणून कार्यरत होते. त्यांनी अनेक वर्षे रोझलँड शाळेला मोलाचे मार्गदर्शन व सहकार्य केले होते. त्यांच्या शैक्षणिक कार्याची दखल घेत तत्कालीन राष्ट्रपती डॉ. शंकर दयाल शर्मा यांच्या हस्ते त्यांना “आदर्श शिक्षक” पुरस्कार प्रदान करण्यात आला होता. विद्यार्थ्यांप्रती असलेला जिव्हाळा, उत्कृष्ट अध्यापनशैली आणि शैक्षणिक बांधिलकी यामुळे ते आजही विद्यार्थ्यांच्या स्मरणात आहेत. ते शासकीय पॉलिटेक्निक महाविद्यालयाचे प्राचार्य म्हणून निवृत्त झाले होते. तसेच जळगावमधील पहिले आरसीसी सल्लागार म्हणूनही त्यांची ओळख होती. उत्तर महाराष्ट्र विद्यापीठाच्या विविध प्रकल्पांचे मार्गदर्शन व देखरेख करण्याचे कार्यही त्यांनी केले होते. त्यांच्या प्रेरणेतूनच हा सौर ऊर्जा प्रकल्प साकारण्यात आल्याची भावना यावेळी व्यक्त करण्यात आली.
कार्यक्रमाच्या निमित्ताने नुकत्याच जाहीर झालेल्या एस.एस.सी. बोर्ड परीक्षेतील गुणवंत विद्यार्थ्यांचाही सत्कार करण्यात आला. विद्यालयातील विद्यार्थिनी अफिफा खान हिने ९०.६० टक्के गुण मिळवत प्रथम क्रमांक पटकावला. सोहम पाटील याने ८४.६० टक्के गुणांसह द्वितीय, तर सायमीन सैय्यद हिने ८४.४० टक्के गुणांसह तृतीय क्रमांक मिळविला. गुणवंत विद्यार्थ्यांचा सन्मान डॉ. मिलिंद वायकोळे आणि डॉ. सतीश दलिचंद ओसवाल यांच्या हस्ते करण्यात आला.
कार्यक्रमाला प्रमुख पाहुणे म्हणून मोजुद्दीन शेख, सौ. मनीषा बंब, श्री. संतोष प्रधान, वाय. एस. पाटील उपस्थित होते. तसेच रोझलँड मराठी माध्यमाचे प्राचार्य श्री. घोलाने सर, रोझलँड इंग्रजी माध्यमाच्या प्राचार्या सौ. सीता तिवारी, नावेद निजामी सर, श्री. प्रवीण भोळे, शिक्षकवृंद, पालक आणि विद्यार्थी मोठ्या संख्येने उपस्थित होते.
