जळगाव मिरर | ३० जून २०२६
यावल तालुक्यातील श्रीक्षेत्र मनुदेवी फाट्यावर रविवारी सायंकाळी झालेल्या भीषण अपघातात चिंचोली येथील ३७ वर्षीय तरुणाचा जागीच मृत्यू झाल्याची दुर्दैवी घटना घडली. भरधाव वेगाने येणाऱ्या ट्रकने दुचाकीला जोरदार धडक दिल्याने हा अपघात झाला. या घटनेमुळे परिसरात हळहळ व्यक्त होत असून, यावल पोलिसांनी ट्रक चालकाविरुद्ध गुन्हा दाखल केला आहे.
मृत तरुणाचे नाव विजय राजेंद्र सपकाळे (वय ३७, रा. चिंचोली, ता. यावल) असे आहे. मिळालेल्या माहितीनुसार, विजय सपकाळे हे त्यांच्या एमएच १९ एक्यू ३१६६ क्रमांकाच्या दुचाकीवरून श्रीक्षेत्र मनुदेवी फाट्याजवळून जात होते. त्याचवेळी एमपी ०९ एचजी ९५६५ क्रमांकाच्या भरधाव ट्रकने त्यांच्या दुचाकीला जोरदार धडक दिली. धडक इतकी भीषण होती की, विजय सपकाळे यांचा घटनास्थळीच मृत्यू झाला.
या अपघाताची माहिती मिळताच स्थानिक नागरिकांनी घटनास्थळी धाव घेतली. तसेच पोलिसांनी घटनास्थळी पोहोचून पंचनामा करत मृतदेह शवविच्छेदनासाठी पाठविला.
या प्रकरणी ज्ञानेश्वर जगन्नाथ कोळी यांनी दिलेल्या फिर्यादीवरून ट्रक चालक शेख अन्सार शेख उमर (रा. कवटल, ता. संग्रामपूर, जि. बुलढाणा) याच्याविरुद्ध यावल पोलिस ठाण्यात निष्काळजीपणे व भरधाव वाहन चालवून मृत्यूस कारणीभूत ठरल्याप्रकरणी गुन्हा दाखल करण्यात आला आहे.
या घटनेचा पुढील तपास सहायक फौजदार वसंत बेलदार करीत आहेत. मनुदेवी फाट्यावर वाढत्या वाहतुकीमुळे वारंवार अपघात होत असल्याने या ठिकाणी वेगमर्यादेची काटेकोर अंमलबजावणी, वाहतूक नियंत्रण आणि आवश्यक सुरक्षात्मक उपाययोजना करण्याची मागणी स्थानिक नागरिकांकडून होत आहे.
