जळगाव मिरर | २७ फेब्रुवारी २०२६
शहरातील स्वच्छता आणि आरोग्य सुविधा अधिक सक्षम करण्यासाठी महापौर दीपमाला काळे यांनी दिलेल्या सूचनेनुसार, आता शहरात ‘नगरसेवक डायरी’ उपक्रम गेल्या दोन दिवसांपासून अधिकृतपणे सुरू झाला आहे. या उपक्रमामुळे प्रभागातील कामांमध्ये पारदर्शकता येऊन तक्रारींचे निवारण जलद गतीने होईल, असा विश्वास महापौरांनी व्यक्त केला आहे.
काय आहे ‘नगरसेवक डायरी’ उपक्रम?
आरोग्य विभागाच्या काही दिवसांपूर्वी झालेल्या बैठकीत महापौरांनी प्रशासनाला या डायरीबाबत कडक निर्देश दिले होते. या उपक्रमाचे स्वरूप, प्रत्येक प्रभागातील आरोग्य निरीक्षकांकडे ही डायरी सोपवण्यात आली आहे. संबंधित आरोग्य निरीक्षकाने आपल्या प्रभागातील कामाची माहिती नगरसेवकांना देऊन त्यावर त्यांची स्वाक्षरी घेणे बंधनकारक आहे.
डायरीमध्ये केवळ सहीच नाही, तर कामाच्या दर्जाबाबत नगरसेवकांचे अभिप्राय आणि सूचना नोंदवल्या जातील. यामुळे आरोग्य विभागाने दिवसभरात नेमके काय काम केले, याचा थेट अहवाल लोकप्रतिनिधींच्या माध्यमातून प्रशासनासमोर येणार आहे. अनेकदा प्रभागात काम होत नसल्याच्या तक्रारी नगरसेवकांकडून केल्या जातात, तर दुसरीकडे प्रशासनाकडून काम पूर्ण झाल्याचा दावा केला जातो. हा पेच सोडवण्यासाठी ‘नगरसेवक डायरी’ एक महत्त्वाचा दुवा ठरणार आहे. या नवीन उपक्रमामुळे शहरातील कचरा संकलन, गटारींची स्वच्छता आणि औषध फवारणी यांसारख्या मूलभूत सुविधांच्या नियोजनात मोठी सुधारणा होण्याची शक्यता वर्तवण्यात येत आहे.
“आरोग्य निरीक्षकांनी नगरसेवकांच्या संपर्कात राहून स्वच्छतेची कामे करून घेणे अपेक्षित आहे. या डायरीमुळे कामात पारदर्शकता येईल आणि कर्मचाऱ्यांच्या कार्यक्षमतेवर देखरेख ठेवणे सोपे होईल.”
— दीपमाला काळे, महापौर
