जळगाव मिरर | ९ मे २०२३
अजिंठा चौफुली येथे एका महिलेने धिंगाणा घालत पुरुषावर चाकूहल्ला करण्याचा प्रयत्न केल्याचा प्रकार रविवारी दुपारी घडला होता. या प्रकाराचा व्हिडीओ सोशल मीडियावर व्हायरल झाल्यानंतर एमआयडीसी पोलिसांनी महिला व पुरुषाविरुद्ध गुन्हा दाखल केला असून महिलेला महाबळ कॉलनीतून ताब्यात घेतले आहे. माधुरी सागर राजगिरे (३२, रा. रामेश्वर कॉलनी) असे ताब्यात घेतलेल्या महिलेचे नाव आहे.
या घटनेचा व्हिडीओ सोशल मीडियावर व्हायरल झाला होता. घटनेनंतर कुणीही तक्रार देण्यास न आल्यामुळे एमआयडीसी पोलिसांनी महिला व पुरुषाचा शोध सुरू केला. त्यावेळी पोलिसांना त्या महिलेचे माधुरी राजगिरे तर पुरुषाचे सागर भिकन राजगिरे (रा. रामेश्वर कॉलनी) असे नाव निष्पन्न झाले तर दोन्ही पती-पत्नी असून कौटुंबिक वादातून ही घटना घडल्याची माहितीदेखील समोर आली. पोलिसांनी सोमवारी महिलेला महाबळ कॉलनी येथून ताब्यात घेतले आहे तर तिच्या पतीचा शोध सुरु आहे.
रविवारी दुपारी ३ वाजेच्या सुमारास अजिंठा चौफुली येथील महेंद्रा हॉटेलसमोर एक महिला शिवीगाळ करीत एका पुरुषावर चाकूहल्ला करण्याच्या प्रयत्न करीत असल्याची घटना घडली होती. दरम्यान, दोघांविरुद्ध भादंवि कलम १६० मुंबई पोलिस कायदा कलम ११२, ११७ प्रमाणे गुन्हा दाखल करण्यात आला आहे. ही कारवाई अतुल वंजारी, सुधीर साळवे, इमरान सय्यद, योगेश बारी, छगन तायडे, किरण पाटील यांनी केली आहे.
